लोकप्रिय गजल गायक राज सिग्देलले एकल गजल गायन गर्ने भएका छन्।
भोलि शनिबार (चैत १६ गते) नयाँ बाँनेश्वर, थापागाउँस्थित मण्डला थिएटरमा आयोजित बिम्ब उत्सवमा राज सिग्देलले एकल गजल प्रस्तुत गर्ने भएका हुन्।
बिम्ब आर्टसको प्रस्तुतिमा हुने एकल गजल गायन दिउँसो ४ बजेबाट सुरू हुने बताइएको छ। आयोजक बिम्ब आर्टसकी संगीता थापा मगरका अनुसार कार्यक्रममा अन्य संगीतकारहरू चण्डिप्रसाद काफ्ले, सुरेश गैरे, केशव पौडेल, एलिया सुनुवार, राज सागर र दिनेश गौतमको पनि उपस्थिति रहनेछ।
गायक राज सिग्देलले १३ वर्षपछि आफूले एकल गजल गायन गर्न लागेको जानकारी दिए। '१३ वर्षअघि नाचघरमा एकल गजल गायन गर्ने मौका पाएको थियो। यो अवधिमा मैले पनि धेरै कुरा सिक्ने, बुझ्ने मौका पाएको छु, त्यसैले कार्यक्रमको अवधिभर मेरो झण्डै २० वटा गजल प्रस्तुत गर्ने कोसिस गर्नेछु' गायक सिग्देलले भने, 'कार्यक्रमको समयावधि दुईघण्टा राखेका छौं।'
टिकट दर ५ सय र १ हजार रूपैयाँ राखिएको आयोजकले जनाएको छ।
