टेकुस्थित कौसी थिएटरमा नाटक 'गिल्टी अर नट गिल्टी' मञ्चन हुने भएको छ।
जेठ ३ देखि २६ गतेसम्म नाटक मञ्चन हुन लागेको हो। मंगलबार बाहेक साताको प्रत्येक दिन बेलुका ५ः३० बजे नाटक मञ्चन हुने र शनिबार दिउँसो १ बजेको अतिरिक्त शो हुने जानकारी दिइएको छ।
रसियन–अमेरिकन लेखक अयन र्यान्डको नाटक 'अन द नाइट अफ जनवरी सिक्सटिन्थ' मा आधारित नाटक राजकमल फकिरको निर्देशन तथा डिजाइनमा तयार भएको हो।
नेपालीकरण गरिएको यो नाटकले अग्रवाल इन्भेष्मेन्ट भेन्चरका सञ्चालक राधेश्याम अग्रवाल पात्रको १९ औं तलाबाट खसेर मृत्यु भएपछि घटना हत्या हो कि आत्महत्या हो भन्ने विषयको अदालती बहस प्रस्तुत गर्नेछ।
रहस्य र थ्रीलर जनराको नाटकमा विजय ताम्राकार, आभास अधिकारी, समापिका गौतम, बासना तिमल्सिना, रुपेश लामा, सागर दाहाल, जेम्स ढकाल, अशोक गौतम, नवीन चन्द्र अर्याल, अरुण पौडेल, सुष्मा निरौला, मनिष ब्यन्जु, सदिन लुइँटेल, रौनक कार्की, विजया पौडेल, इशा सिजाली लगायत कलाकारको अभिनय छ।
फकिर ड्रिमको प्रस्तुति रहेको नाटकमा ध्वनि संयोजन नरेश गजुरेलको तथा प्रकाश व्यवस्थापन आशान्त शर्माको रहनेछ।
