गायिका रचना रिमालले तीज गीत 'बिलौना' सार्वजनिक गरेकी छन्।
उनले गायक बद्री पंगेनीसँगको स्वरमा शुक्रबार यो गीत ल्याएकी हुन्।
गीतमा बिहे गरेर गएकी बहिनी र तीजमा उनलाई लिन पुगेका दाइको पीडा र प्रेमलाई समेटिएको छ। भिडिओमा रचना र बद्रीले नै बहिनी र दाइको भूमिकामा अभिनय गरेका छन्।
गीतमा श्रीमानको घर गएपछि भोग्नुपरेका दुःख, बाल्यकालको सम्झना, दाइ र बहिनीको प्रेम, अन्य सुख-दुःखका कुरा गरिएको छ।
दाजु बहिनीबीचको सम्बन्धलाई मार्मीक ढंगले प्रस्तुत गरिएको गीतका शब्द नारायण ज्ञवालीका हुन्। शिव हमालको संगीत रहेको गीतलाई विश्वास नेपालले संगीत संयोजन गरेका छन्।
राजेश घिमिरेको छायांकन एवं निर्देशन रहेको भिडिओलाई नवीन घर्ती मगरले सम्पादन गरेका हुन्।
भिडिओ 'रचना रिमाल' युट्युब च्यानलमा सार्वजनिक छ।
