बलिउड अभिनेता कार्तिक आर्यन अभिनीत फिल्म 'भूल भुलैया ३' को शीर्ष गीत सार्वजनिक भएको छ।
बुधबार टि-सिरिज युट्युब च्यानलमार्फत फिल्मको शीर्ष गीत सार्वजनिक गरिएको हो। पितबुल, दिलजीत दोसाँझ र नीरज श्रीधरको स्वर रहेको गीतमा कार्तिक आर्यनको नृत्य छ। धुव्र योगी र समीरको शब्द रहेको गीतमा तनिश्क बाग्ची र प्रितमको संगीत छ।
अनीस बज्मी निर्देशित फिल्ममा कार्तिक आर्यन, विद्या बालन, तृप्ति डिमरी, माधुरी दीक्षित, राजपाल यादवलगायत कलाकारको अभिनय छ।
यो फिल्म नोभेम्बर १ देखि प्रदर्शन हुनेछ।
सन् २००७ मा प्रदर्शन भएको फिल्म 'भूल भुलैया' मा विद्या बालन मञ्जुलिका बनेकी थिइन् भने अक्षय कुमार डाक्टर आदित्य। प्रियदर्शनले निर्देशन गरेको फिल्मलाई दर्शकले खुब रूचाएका थिए।
सन् २०२२ मा प्रदर्शन भएको फिल्म 'भूल भुलैया २' मा कार्तिक आर्यनले अक्षय कुमारको ठाउँ लिएका थिए। अनीस बज्मी निर्देशित फिल्ममा तब्बूले चुडेलको भूमिका निर्वाह गरेकी थिइन्।
