दशैंमा विदाको समयमा परिवार, साथीभाईसँग समय बिताउनको लागि फिल्म हेर्न जानुको मज्जा वेग्लै हुन्छ। विदाको समयमा कुन फिल्म हेर्ने भन्ने सोचमा हुनुहुन्छ भने यहाँ हामी रिलिजको तयारीमा रहेका फिल्मको जानकारी दिन्छौं।
विजयदशमीलाई लक्षित गरि फिल्म प्रदर्शनको लागि नेपाली हलमा नेपाली र हिन्दी फिल्म तयारी अवस्थामा छन्। दीपाश्री निरौलाको निर्देशनमा बनेको गत वर्षको हिट फिल्म ‘छक्का पञ्जा’को सिक्वेल फिल्म ‘छक्का पञ्जा २’ यही असोज ११ गते बुधबार प्रदर्शनको तयारीमा छ।
यस वर्षको प्रतिक्षित फिल्म 'छक्का पञ्जा २'को लागि मल्टिप्लेक्स बुकिङ पनि खुल्ला गरिएको छ। 'छक्का पञ्जा'को सफलतापछि यस फिल्म प्रदर्शन अघि नै 'नाइलनको साडी' र 'झ्याम्म झ्याम्म' बोलको गीत सर्वाधिक रुचाइएको छ।
कमेडी फिल्म ‘छक्का पञ्जा २’ मा दीपकराज गिरी, प्रियंका कार्की, वर्षा राउत, स्वस्तिमा खड्का, स्वरूपपुरुष ढकाल, केदार घिमिरे, जितु नेपाल, लगायतका कलाकारको अभिनय रहेको छ।
यसैगरि असोज ११ गते रोज राणाको निर्माणमा बनेको फिल्म ‘मेरो पैशा खोइ’ पनि रिलिजको तयारीमा छ। सौगात मल्ल र वर्षा राउत अभिनित फिल्म ‘मेरो पैशा खोइ’ हलहरुमा र डिस होममा एकसाथ प्रदर्शन हुने निर्माण पक्षले घोषणा गरेको छ। सिमित पैशा तिरेर दिनको ३ सो प्रसारण डिस होममा हेर्न सकिने छ। हलसम्म पुग्न नसक्ने दर्शकले घरमै फिल्म हेर्न पाउनेछन्।
फिल्म 'मेरो पैशा खोइ’मा सौगात मल्ल, रबिन तामाङ , छुल्ठिम गुरुङ, बुद्धि तामाङ, बर्षा राउत लगायतका कलाकारको अभिनय रहेको छ।
यसैगरि हिन्दी फिल्म बरुण धवनको 'जुडवा' असोज १२ गते नेपाली हलमा प्रदर्शनको तयारीमा छ। एक्सन कमेडी फिल्म 'जुडवा'मा बरुण धवन, ज्याक्लिन फर्नान्डेज, तपसी पन्नु मुख्य भूमिकामा छन्। फिल्मलाई डेविड धवनले निर्देशन गरेका छन्।
