९८ औं एकेडेमी अवार्ड (अस्कर अवार्ड) को अन्तर्राष्ट्रिय फिचर फिल्म विधामा नेपालबाट 'अञ्जिला' सिफारिस भएपछि अर्को फिल्म 'गुन्योचोलोः द ड्रेस' को टोलीले असन्तुष्टि व्यक्त गरेको छ।
विश्वप्रसिद्ध फिल्म फेस्टिभल अस्करमा प्रतिस्पर्धा गर्नका लागि छनोट समितिमा दुई नेपाली फिल्म 'अञ्जिला' र 'गुन्योचोलो' को आवेदन परेको थियो।
बिहीबार 'अञ्जिला' छनोट भएको खबर सार्वजनिक भएसँगै 'गुन्योचोलो' टीमले छनोट समितिमाथि प्रश्न उठाएको हो।
शुक्रबार रिपोर्टर्स क्लबमा आयोजित पत्रकार सम्मेलनमा बोल्दै 'गुन्योचोलो' निर्देशक समुन्द्र भट्टले नेपालको छनोट समितिले अपारदर्शी ढंगले मूल्यांकन गरेको दाबी गर्दै यो निर्णय खारेज हुनुपर्ने बताइन्।
आक्रोशित रूपमा प्रस्तुत भएकी उनले भनिन्, 'यो निर्णय खारेज हुनैपर्छ। सिफारिसका लागि छनोटको कार्यविधि पेस गर्नुभएको छैन। छनोट त्रुटिपूर्ण छ। ल्यापटपमा फिल्म हेर्ने परिपाटी अन्त्य हुनुपर्छ। समितिमा फिल्मको भाषा बुझ्ने मान्छेहरू हुनुपर्छ। कस्तो फिल्म अन्तर्राष्ट्रिय बजारमा जाने हो, कस्तो फिल्मले प्रतिनिधित्व गर्ने हो भन्ने ज्ञान भएको व्यक्ति हुनुपर्छ।'
अहिले समितिमा भएका कोही पनि व्यक्ति त्यसका लागि योग्य नभएको उनले आरोप लगाइन्।
समुन्द्र भट्टले आफूहरूले अस्कर अवार्डकै लागि भनेर वर्षौं लगाएर फिल्म बनाएको बताइन्।
'मेरो फिल्मको साउन्ड डिजाइन यसरी मीठोसँग गरेको छु। अस्करको मापदण्ड र सर्तहरू जे छन् त्यसरी मार्सेलो डी फ्रान्सिस्कीबाट साउन्ड डिजाइनको काम गरेँ। जो अस्कर नोमिनेटेड व्यक्ति हुनुहुन्छ,' उनले भनिन्, 'यही अस्करका लागि तीन वर्ष मिहिनेत गरेँ। तर अस्कर समितिमा जति पनि जुरी सदस्य हुनुहुन्छ, उहाँहरूले अन्याय गर्नुभयो।'
उनले समितिका एकजना सदस्यले फिल्मसमेत नहेरी निर्णय गरेको सुनाइन्। उनले समितिमा अर्को फिल्मको मिडिया कोअर्डिनेटर कसरी रहेको भनेर प्रश्नसमेत गरिन्। अहिले फिल्म रिलिज गर्नुको कारण पनि अस्करकै लागि भएको उनले बताइन्।
'फर्म खुलेको पनि मैले उहाँहरूबाट जानकारी पाएकी होइन,' उनले भनिन्, 'अञ्जिलासँग मेरो दुश्मनी केही होइन। तर त्यहाँ धेरै राजनीति हुँदोरहेछ। त्यसको सिकार म भएँ। मेरो जीवन हो, गुन्योचोलो। वर्षौं लगाएर मिहिनेत गरेको अस्करकै लागि हो। त्यहीअनुसारको काम गर्दागर्दै म अन्यायमा परेको छु।'
उनले अस्कर समितिमा साउन्ड हेर्ने व्यक्तिसमेत नभएको बताइन्। 'फिल्म केका आधारमा छनोट गरिन्छ? मैले हिजो कार्यविधि मागेँ। कसैले फोन उठाउनुभएको छैन', उनले भनिन्, 'कलाको क्षेत्रबाट देशको प्रतिनिधित्व गर्ने कुरामा जिम्मेवारी भएन। यो कसैको सिर्जनामाथि गरेको खेलवाड हो। यो मेरो मात्र नभई फिल्म क्षेत्रको लडाइँ हो। यो समिति खारेज गरिनुपर्छ।'
फिल्मका लेखकसमेत रहेका अभिनेता नाजिर हुसेनले समितिका व्यक्ति इमानदार हुनुपर्ने बताए। 'समितिका एकजना सदस्य अमेरिकामा हुनुहुन्छ। उहाँले फिल्म नहेरी निर्णय गर्नु कति जायज हो? मिडिया कोअर्डिनेटर सदस्य भएको समितिमा आफ्नै फिल्म छनोट हुनु कति जायज हो?' नाजिरले पारदर्शितामाथि प्रश्न उठाए।
उनले थपे, 'फलानो फिल्म सिफारिस भयो, फलानो भएन भन्दा पनि हाम्रो प्रश्न नियतमा हो। पारदर्शी हुनुपर्यो भन्ने हो।' समुन्द्रले समितिले के आधारमा फिल्म छनोट गर्यो, त्यसको जवाफ चाहिने बताइन्।
अन्य कतिपय फिल्मकर्मीले समेत समितिमाथि प्रश्न उठाएका छन्।
-1758107792.jpg)
-1746513231.jpg)
-1746009348.jpg)
