यम शेर्पाको निर्देशनमा बनिरहेको फिल्म 'मिरमिरे' को छायांकन कार्य सकिएको छ।
३५ दिनको कार्यतालिकामा छायांकन गरिएको फिल्म काभ्रेका विभिन्न रमणीय स्थल र मकवानपुरको चित्लाङमा खिचिएको हो।
फिल्मको एक गीतको छायांकन भने अझै बाँकी रहेको र समय अनुकूल मिलाएर त्यसलाई पनि सकाइने निर्देशक शेर्पाले जानकारी दिए।
निर्माण पक्षले हालै अभिनेत्री सिर्जना निङलेखुको जन्मदिनको अवसर पारेर फिल्मको प्रदर्शन मिति घोषणा गरेको थियो। फिल्म 'मिरमिरे' आगामी माघ १ गतेबाट देशव्यापी रूपमा प्रदर्शनमा आउनेछ।
यार्सा फिल्म्सको प्रस्तुति रहेको 'मिरमिरे' मा नेपाली फिल्म क्षेत्रका चर्चित अभिनेता दयाहाङ राई र गायक तथा अभिनेता प्रकाश सपुतले पहिलो पटक एकसाथ काम गरेका छन्।
उनीहरूसँगै फिल्ममा सिर्जना निङलेखुको मुख्य भूमिका छ। साथै, माओत्से गुरूङ, छुल्ठिम गुरूङ, भोलाराज सापकोटालगायत कलाकारहरूको पनि अभिनय देख्न पाइनेछ। शाइसा गौचन, दिविशा पन्त, चिराग श्रेष्ठ र नमनराज गजुरेललगातका बाल–कलाकारहरुको समेत अभिनय छ।
फिल्मको कथा लेखन तथा निर्देशन यम शेर्पा आफैँले गरेका हुन्। यो उनको दोस्रो निर्देशकीय फिल्म हो। यसअघि उनले निर्देशन गरेको फिल्म ‘कार्साङ’मा पनि दयाहाङ मुख्य भूमिकामा थिए।
निमु शेर्पा, छोङ्बा लामा शेर्पा र आङ्छिरिङ शेर्पा निर्माता रहेको यस फिल्मका सह–निर्मातामा गोविन्द बोहरा र सुदीप कुँवर छन्। फिल्म वितरक तथा आरआर फिल्म्सका सञ्चालक रोहित कट्टेल यस फिल्मका कार्यकारी निर्माता छन्। फिल्मको छायांकन आलोक शुक्लाले गरेका हुन्।
फिल्मको देशभर वितरणको जिम्मा पनि आरआर फिल्म्सले नै लिएको छ।
-1746009348.jpg)
