तीन महिनादेखि प्रसारण रोकिएको चर्चित सिरियल 'सक्किगोनि' अन्योलमा रहँदा यसका केही कलाकारहरूले नयाँ सिरियल सुरू गरेका छन्।
कलाकारहरू बबिन राई (गल्फने), रश्मी पाण्डे (माकुरी), भावना आचार्य (लुरी), सुस्मिता कुवँर (छोटी), कविराज भाम (मान्ठा)लगायतले 'धनपुरे टोल' मा अभिनय सुरू गरेका हुन्।
यो कमेडी टिभी सिरियल आउँदो आइतबारदेखि टेलिभिजन र युट्युबमा प्रसारणमा आउने तयारीमा छ।
सिरियलमा केशव सापकोटा, अनुमती नेपाली, प्रल्हाद गिरी, सपना क्षेत्री, प्रमिला चाम्लिङ राई, जोसना दर्लामी मगरलगायत कलाकारहरूले पनि अभिनय गरेका छन्।
'धनपुरे टोल' को टिजर र ट्रेलर यसअघि युट्युबमा सार्वजनिक भइसकेको छ।
सिरियलका निर्देशक सुरेश थापा तथा निर्माता श्रीकृष्ण श्रेष्ठ हुन्।
आइतबार बेलुका ८ बजे एपीवान टेलिभिजन र ९ बजे ईएच डिजिटल युट्युबमा यो सिरियल आउनेछ।
