चर्चित हास्य सिरियल 'सक्किगोनि' टिमले निर्माण गरेको फिल्म 'लाज शरणम्' ले प्रदर्शनको ५१ दिन पूरा गरेको छ।
कुमार कट्टेल निर्देशित यो फिल्मले बिहीबार प्रदर्शनको ५१ औं दिन मनाएको हो।
जेपीटी क्रिएसनको ब्यानरमा निर्माण भएको यो फिल्म शिवरात्रिको अवसर पारेर फागुन १४ गते उच्च शो सहित रिलिज भएको थियो।
फिल्मले १३ वटा हलहरूमा प्रदर्शनको ५१ औं दिन मनाएको हो।
काठमाडौं उपत्यकाका क्युएफएक्स, आइएनआई सिनेमाज, एफक्युब सिनेमाज, कीर्तिपुर सिनेप्लेक्स, बीएसआर मुभिज, रञ्जना सिनेप्लेक्स, बिग मुभिज, सीडीसी सनेमा र मोफसलमा झापाको विर्तामोडमा रहेको क्युएफएक्स, दमकमा रहेको डिम्याक्स सिनेमाज र बुटवलमा रहेको आइएनआई सिनेमाजमा प्रदर्शनको ५१ औं दिन पूरा गरेको निर्माता नवीन श्रेष्ठले बताए।
उनले फिल्म अहिले पनि राम्रो अकुपेन्सीमा चलिरहेको बताए।
यो फिल्मले पहिलो दिन एक करोड १० लाख रुपैयाँ ग्रसकलेक्सन गरेको थियो। अहिलेसम्म आउँदा फिल्मले ५ करोड रुपैयाँ ग्रसकलेक्सन गरेको निर्माता श्रेष्ठले जानकारी दिए।
यो फिल्ममा सिताराम कट्टेल, महेश त्रिपाठी, विजय बराल, अर्जुन घिमिरे (पाँडे), सागर लम्साल (बले), हरिश निरौला (कक्रोज), रेणु योगी, अर्पण थापा लगायतका कलाकारहरू मुख्य भूमिकामा छन्।
यस्तै, फिल्ममा कमलमणी नेपाल (खुपीका बाउ), मुकुन्द श्रेष्ठ, माला लिम्बुसँगै प्रियाना आचार्य (मुन्नी), बबिन राई (गल्फने बाजे), रामभजन कामतलगायत कलाकारहरूको पनि अभिनय छ। सुदीप बराल छायांकार रहेको फिल्मको सह–निर्माता राम नरेश शाह र सिर्जना खड्का हुन्।
