चर्चित हास्य टेलिसिरियल 'सक्किगोनि' टिमले बनाएको फिल्म 'लाज शरणम्' फागुन १४ गतेदेखि प्रदर्शनमा आउने तयारीमा छ।
यो फिल्ममा उक्त सिरियलका अधिकांशजसो कलाकारहरूले अभिनय गरेका छन्। अरू कलाकार फरकफरक लुक्स र चरित्रमा देखिए पनि अर्जुन घिमिरे 'पाँडे' फिल्ममा पनि सिरियलकै गेटअपमा देखिएका छन्।
पोस्टर र टिजरमा पनि यो कुरा खुलाइएको छ।
दर्शकले अहिले आफूलाई यही क्यारेक्टरमा मन पराइरहेकाले फिल्ममा पनि राखिएको उनको भनाइ छ। फिल्ममा छोटो तर प्रभावकारी चरित्रमा आफू रहेको अर्जुनले सुनाए।
'सक्किगोनि' का निर्देशकसमेत रहेका उनी 'लाज शरणम्' मा कार्यकारी निर्माता पनि हुन्। उनले आफूहरूको चार वर्षको मेहनतपछि फिल्म बनेको बताएका छन्। फिल्मको कथा लेख्न थालेको करिब चार वर्षपछि 'लाज शरणम्' बनेको उनको भनाइ छ।
'लाज शरणम्' ले कर्णालीका आम नागरिकको कथा भन्ने उनले बताए। उनका अनुसार कर्णालीमा आम नागरिकले भोगिरहेको कथा र उनीहरूको जीवनसँग खेलबाड गर्ने उपल्लो वर्गको कथा फिल्ममा देख्न पाइने उनी बताउँछन्।
डार्क कमेडी फर्ममा कथा भन्ने उनले प्रष्ट पारेका छन्। 'डार्क ह्युमर कमेडी फर्मममा कसरी हसाउँदा हसाउँदै गम्भीर कथा भन्न सकिन्छ भनेर हामीले सिनेमाको यो कथा भनेका छौं', अर्जुन भन्छन्, 'हामीले हाम्रो करियरको यो लामो समय टेलिचलचित्रमार्फत दर्शकलाई हसायौँ। अब सिनेमामार्फत हसाउने प्रयास गर्दैछौं।'
सिरियलमा जस्तै फिल्ममा पनि दर्शकको साथ रहनेमा आफूहरू ढुक्क रहेको उनी बताउँछन्।
'लाज शरणम्' कुमार कट्टेल (जिग्री) ले लेखन तथा निर्देशन गरेका हुन्।
फिल्ममा सिताराम कट्टेल (धुर्मुस), मुकुन्द श्रेष्ठ, महेश त्रिपाठी, विजय बराल, अपर्ण थापा, रेणू योगी, कमलमणि नेपाल, माला लिम्बू, ‘सक्किगोनि’ टिमका कलाकारहरू अर्जुन घिमिरे (पाँडे), सागर लम्साल (बले), हरिष निरौला (क्रकोज), प्रियाना आचार्य (मुन्नी) लगायतका कलाकारहरू छन्।
जेपिटी क्रियसनको ब्यानरमा निर्माण भएको फिल्ममा नवीन श्रेष्ठ निर्माता, राम नरेश शाह र सृजना खड्का सह–निर्माताको रूपमा छन्। फिल्मलाई सुदीप बरालले छायांकन गरेका हुन्।
महाशिवरात्रिको अवसर पारेर फिल्म प्रदर्शनमा आउन लागेको हो।
