राम्रो व्यापार गरिरहेको फिल्म 'पूर्ण बहादुरको सारंगी' लाई प्रधानमन्त्री केपी शर्मा ओलीले बधाई दिएका छन्।
फिल्मको समीक्षात्मक र व्यवसायिक सफलताप्रति यसका निर्माता र कलाकारलाई ओलीले बधाई दिएका हुन्।
सामाजिक सञ्जालमा स्टाटस लेख्दै उनले अनुकूलता मिले फिल्म हेर्ने समेत उल्लेख गरेका छन्।
ओलीले लेखेका छन्, 'पूर्ण बहादुरको सारंगी फिल्म हेर्न निम्तो आएको छ। तर समय अभावले हेर्न पाएको छैन। फिल्मको समीक्षा हेर्दैगर्दा यसले हाम्रो सामाजिक परम्परा र व्यवसायिकताको अन्तरद्वन्द्वलाई राम्रोसँग उठान गरेको बुझेको छु। अनुकूलता मिले फिल्म हेर्ने छु। फिल्मका निर्माता र कलाकारहरुलाई बधाई!'
लक्ष्मीपूजाको दिन रिलिज 'पूर्ण बहादुरको सारंगी' लाई दर्शकहरूले सकारात्मक प्रतिक्रिया दिइरहेका छन्।
दर्शकले रूचाएसँगै हलले पनि फिल्मको शोमा वृद्धि गरेका छन्।
सरोज पौडेलले फिल्म लेखन तथा निर्देशन रहेको फिल्ममा विजय बराल, प्रकाश सपुत, अञ्जना बराइली, मुकुन भुसाल, बुद्धि तामाङ, अलिशा बास्तोला, देशभक्त खनाल, भोलाराज सापकोटा, विनोद न्यौपाने, माओत्से गुरूङ, जान्वी पौडेल, स्वयंम केसी लगायत कलाकारहरूको अभिनय छ।
निर्मातामा बिनोद पौडेल र प्याट्रिक सुवेदी छन्।
