केही साताअघि बलिउड अभिनेता अमिताभ बच्चन कोरोना भाइरसको संक्रमणले थलिएका थिए। उनीसँगै उनका छोरा अभिषेक बच्चन, बुहारी ऐश्वर्या राय र नातिनी आराध्यामा पनि कोरोना संक्रमण पुष्टि भएको थियो।
अमिताभले २३ दिन अस्पतालमा आइसोलेसनमा बिताई हालै निको भएर घर फर्केका हुन्। उनी कोरोना मुक्त भएसँगै बुधबार एउटा ब्लग सार्वजनिक गरेका छन्। उनले ब्लगमा आफू पुनः काममा फर्कने तयारीमा रहेको बताएका छन्।
'कौन बनेगा करोडपति (केबिसी) को सुटिङ नजिकिँदै छ। सामाजिक दुरी कायम गर्दै सुरक्षासाथ कार्यक्रम सञ्चालन गरिनेछ,' हिन्दुस्तान टाइम्सले छापेको छ। उनले केबिसीको प्रोमो सुटिङ नजिकिँदै गर्दा पुरै टोली यसको प्रस्तुतिकरणका लागि तयारी रहेको बताएका छन्।
अमिताभ केबिसीसँगै फिल्महरुमा पनि देखा पर्नेछन्। उनको अभिनय रहेको 'झुण्ड', 'चेहरे' र 'ब्रह्मास्त्र' लगायतका फिल्म सार्वजनिक हुन बाँकी छन्। हालसालै उनी अमेजन प्राइम भिडियो मार्फत् सार्वजनिक गरिएको सुजित सिरकारले निर्देशन गरेको 'गुलाबो सिताबो'मा देखिएका थिए। उक्त फिल्ममा उनको अभिनय निकै रुचाइएको थियो।
-1746009348.jpg)
