पोखरामा जारी चारदिने नेपाल साहित्य महोत्सव दक्षिण एसिया एसियाली साहित्यलाई प्रदान गरिने डिएससी पुरस्कार घोषणासँगै सकिएको छ। २५ हजार अमेरिकी डलर (२७ लाख ५० हजार रुपैयाँ)को डिएससी पुरस्कार अमिताभ बागचीको उपन्यास ‘हाफ द नाइट इज गन’ ले जितेको छ।
दक्षिण एसियाका विभिन्न देशमा वितरण गरिँदै आएको यो पुरस्कारको घोषणा र वितरण पहिलो पटक नेपालमा भएको हो।
दक्षिण एसियाली समाजको गुणस्तर अभिवृद्धिमा क्रियाशील दक्षिण एसियाली साहित्यिक पुरस्कार गुठीले विगत आठ वर्षदेखि प्रदान गर्दै आएको हो।
डिएससी पुरस्कार २०१९ मा ६ लेखकका कृतिहरु छनोटमा परेका थिए। पुरस्कारको लागि छनौट भएका पुस्तकहरु-
– अमिताभ बागची को ‘हाफ द नाइट इज गन’
– जामिल जान कोचाईको ‘नाइट्स इन लोगर’
– सादिया अब्बासको ‘द इम्टी रुम’
– माधुरी विजयको ‘द फार फिल्ड’
– राज कमाल झाको ‘द सिटी एण्ड द सी’
– अरुनभा सिन्हाले ट्रान्सलेट गरेको पुस्तक ‘देर इज गन पाउडर इन द इयर’
अंग्रेजी भाषामा अनुवाद गरिएका कृतिलाई समेत प्रदान गरिने डिएससी पुरस्कार वितरण कार्यक्रम नेपालमा हुनुले भविष्यमा नेपाली लेखकलाई समेत उर्जा मिल्ने आयोजकको दाबी छ। पोखराको बाराहीघाटमा आयोजना भएको नेपाल साहित्य महोत्सवको आठौं संस्करण मंसिर २७ देखि सुरु भएको थियो।
महोत्सवमा अघिल्ला संस्करणझैं यस वर्ष पनि देश विदेशका सयभन्दा बढी लेखक, विश्लेषक, पत्रकार, कलाकार, सम्पादक र राजनीतिज्ञहरु वक्ता र सहभागीमा रुपमा उपस्थित थिए। ३५ भन्दा बढी सेसनमा हजारौं साहित्य, समाज र कलाप्रेमीहरुले सहभागिता जनाए।
-1746009348.jpg)
