सेन्ट्रल एसियन भलिबल एसोसिएसन (काभा) यू-२० महिला भलिबल च्याम्पियनसिपमा नेपाल तेस्रो भएको छ।
आज भएको तेस्रो स्थानका खेलमा नेपालले आयोजक माल्दिभ्सको युवा टोलीलाई ३-० को सोझो सेटमा पराजित गरेको हो।
नेपालले पहिलो सेट २५-१५ ले जित्दै विजयी सुरुवात गरेको थियो। दोस्रो सेट नेपालले २५-१० जित्दै खेलमा २-० को अग्रता लियो। तेस्रो सेटमा २५-१४ ले विजयी भएसँगै नेपालले खेल जित्यो।
प्रतियोगितामा नेपालसहित श्रीलंका, कीर्गिस्तान र माल्दिभ्सका युवा टोलीले भाग लिएका थिए।
समूह चरणमा नेपालले माल्दिभ्सलाई हराउँदा कीर्गिस्तान र श्रीलंकाविरूद्धको खेल गुमाएको थियो।
सेमिफाइनलमा कीर्गिस्तानसँग फेरि पराजित हुँदा नेपाल फाइनल पुग्न असफल भयो। श्रीलंका र कीर्गिस्तानबीच आजै उपाधिका लागि प्रतिस्पर्धा हुँदैछ।
