नेपाल कराते महासंघले कराते खेलाडीलाई उपेक्षा र विभेद गरेको बताएको छ।
कराते महासंघका अध्यक्ष युवराज लामाले अन्तर्राष्ट्रिय सफलता प्राप्त गरे पनि खेलाडीलाई उपेक्षा गरेको बताएका हुन्।
‘नेपाल सरकार, मन्त्रीहरू, तथा उच्चस्तरीय नीति-निर्माताहरूले विशेषतः केही सीमित खेल तर्फ मात्र गहिरो ध्यान दिने गरेको विडम्बनापूर्ण यथार्थ अब लुकाउन सकिने विषय रहेन। यस्ता खेलमा राष्ट्रिय वा अन्तर्राष्ट्रिय स्तरमा सामान्य उपलब्धि हासिल भए पनि तत्कालै शुभकामना सन्देश, सम्मान समारोह र लाखौंको पुरस्कार घोषणा गरिन्छ। तर कराते जस्तो ओसिए ओलम्पिक मान्यताप्राप्त र नेपालले अन्तर्राष्ट्रिय स्तरमा निरन्तर सफलतापूर्वक प्रतिनिधित्व गर्दै आएको खेल भने उपेक्षाको शिकार छ,’ उनको भनाइ छ।
उनले केही विशेष खेलमा मात्र सहभागिता जनाउँदा सरकारका उच्च पदस्थ व्यक्तिहरूले सार्वजनिक रूपमा शुभकामना दिने गरेको तर तर करातेले दक्षिण एशियाली, एसियाली र विश्वस्तरीय प्रतियोगितामा पटक–पटक पदक जितेको छ, त्यसप्रति मौनता देखाको बताए।
‘कठिन परिश्रम, प्रतिबद्धता र आत्मबलबाट देशलाई स्वर्ण पदक दिलाउने कराते खेलाडीहरू पुरस्कृत हुन सक्दैनन्,’ महासंघको भनाइ छ, ‘ अन्य खेलमा सामान्य जितमै लाखौं रुपैयाँ पुरस्कार घोषणाको होड चल्छ। खेलकुद मन्त्रालय, राष्ट्रिय खेल परिषदजस्ता निकायहरूले खेलको मूल्यांकन राजनीति, मिडिया चासो र प्रचार-प्रसारको आधारमा गर्छन्। कुनै खेलले देशलाई दिएको वास्तविक योगदान, पदकको निरन्तरता र अन्तर्राष्ट्रिय सम्मानलाई आँखा चिम्लिन्छन्।’
साथै राज्यले विभेदकारी व्यवहारमा उत्रिदा सच्चा खेलाडीहरूको मनोबल कसरी उच्च रहला? भन्दै महासंघले प्रश्न गरेको छ।
अन्तर्राष्ट्रिय महासंघको मान्यता प्राप्त प्रतियोगिता—७औं र ८औं दक्षिण एशियाली कराते महासंघ च्याम्पियनसिपमा पदक जित्ने नेपाली खेलाडीहरू कार्यविधिमा रहे पनि पुरस्कारबाट वञ्चित भएको नेपाल कराते महासंघको भनाइ छ।
हालै सम्पन्न ९औं एसएकेफ च्याम्पियनसिपमा नेपालले २१ स्वर्ण, ९ रजत, र २० कास्यसहित कुल ५० पदक जित्दै ऐतिहासिक उपलब्धि हासिल गरेको तर यसबारे पनि राज्यको तर्फबाट कुनै आधिकारिक सम्मान वा पुरस्कार घोषणा नआएको महासंघले बताएको छ।
-1746009348.jpg)
