राष्ट्रिय उमा कुङफु संघको आयोजनामा सातौं राष्ट्रिय उमा कुङफु प्रतियोगिता शनिबार हुने भएको छ।
प्रतियोगितामा विभिन्न १८ जिल्लाका १ सय ७५ खेलाडीको सहभागिता रहने आयोजक संघका उपाध्यक्ष भूपेन्द्र गुरुङले मंगलबार आयोजित पत्रकार सम्मेलनमा जानकारी गराए । सान्डा, ताइची र प्याटर्नमा गरी जम्मा ३९ स्पर्धामा खेल हुनेछ । सान्डामा १९, ताइचीमा ४ र प्याटर्नको वेयर ह्यान्ड र वेपनमा १६ स्पर्धामा प्रतिस्पर्धा हुनेछ ।
प्रतियोगितालाई सफलतापूर्वक सम्पन्न गर्न अन्तर्राष्ट्रिय निर्णायक समेत रहेका उपाध्यक्ष गुरुङको संयोजकत्वमा ९ सदस्यीय मूल आयोजक समिति गठन गरिएको छ ।
त्यस्तै विभिन्न उपसमिति पनि गठन गरिएको छ । प्राविधिकमा अन्तर्राष्ट्रिय निर्णायक एवं संघका महासचिव कमल मगर, स्वास्थ्यमा उपाध्यक्ष रमेश महर्जन, आर्थिकमा कोषाध्यक्ष सूर्य लामा, प्रचार प्रसारमा सदस्य राजदीश नेम्कुल र सांस्कृतिकमा सदस्य शेरबहादुर गुरुङलाई संयोजकको जिम्मेवारी दिइएको छ ।
प्याटर्न र ताइचीको प्रमुख निर्णायक मण्डलमा उपाध्यक्षद्वय गुरुङ र महर्जन तथा सान्डाको प्रमुख निर्णायक मण्डलमा संघका अध्यक्ष एवं अन्तर्राष्ट्रिय निर्णायक सन्जितकुमार राई र महासचिव मगर प्रमुख निर्णायक मण्डलमा रहने छन् ।
प्रतियोगिता सञ्चालन गर्न करिब ११ लाख रुपैयाँ खर्च हुने अध्यक्ष राईले जानकारी दिए । उपत्यका बाहिरका खेलाडीलाई खाना, बसोवास र यातायत सुविधा उपलब्ध गराइने आयोजकले जनाएको छ । एकदिने प्रतियोगिताका खेलहरु चप्पल कारखानास्थित कुन्डलिनी रोयल्स बैंक्युटमा खेलाडीलाई छ । राष्ट्रिय प्रतियोगितालाई लक्षित गरी फागुन २४ गते राष्ट्रिय रेफ्री सेमिनार पनि सञ्चालन गरिएको थियो ।
