आयोजक मदन भण्डारी स्पोर्ट्स एकेडेमीले प्रथम मदन भण्डारी कप राष्ट्रिय महिला हक्की प्रतियोगितामा मंगलबार जित हात पारेको छ।
एकेडेमीले मधेश प्रदेशलाई ३–१ गोलले पराजित गर्यो। विजयी टिमका लागि ‘प्लेयर अफ द म्याच’ मधु राईले २ तथा शोभा शर्माले १ गोल गरे । मधेशकी शुभम्ले १ गोल गरिन्।
जनकपुरमा भइरहेको प्रतियोगितामा सुदूरपश्चिम प्रदेश र नेपाल आर्मीले पनि जित निकाले। सुदूरपश्चिमले गण्डकी प्रदेशलाई ३–० गोलले हरायो। ‘प्लेयर अफ द म्याच’ सन्जनाकुमारी भारतीले २ तथा नमिता एसकेले १ गोल गरे।
आर्मीले कोशी प्रदेशमाथि ६–० को जित दर्ता गर्यो। दम्मरा भट्ट, ‘प्लेयर अफ द म्याच’ सरस्वती तामाङ, सितामाया बालाक्लाभा, कमला चन्द, ममता भट्ट र सिमा खड्काले समान १–१ गोल गरे।
