स्पेनिस क्लब एट्लेटिको म्याड्रिडका प्रशिक्षक डिएगो सिमोनले युरोपियन च्याम्पियन्स लिगअन्तर्गत इंग्लिस क्लब लिभरपुलविरुद्धको खेलमा लिभरपुलका समर्थकले अपमान गरेको बताएका छन्।
घरेलु मैदानमा कप्तान भान डाइकले ९२ औं मिनेटमा गोल गरेपछि लिभरपुलले ३-२ अग्रता लिएको थियो। सो गोलपछि सिमोनले केही घरेलु समर्थकले आफूलाई गिज्याएको भन्दै प्रतिक्रिया दिएका थिए।
अर्जेन्टिनी प्रशिक्षक सिमोनले फोर्थ अफिसियलसँग गुनासो समेत गरेका थिए। त्यहाँ लिभरपुलका समर्थकहरूबीच केही सुरक्षाकर्मीहरू पनि थिए। सिमोनलाई त्यस ठाउँबाट टाढा लगिएको थियो र उनले आफ्नो विरोध जारी राखेपछि उनलाई मैदानबाट बाहिर पठाइएको थियो।
खेलपछिको पत्रकार सम्मेलनमा ५५ वर्षीय सिमोनले भने, ‘पहिलो कुरा त मैले खेलेको भूमिकाप्रति मलाई पछुतो छ। यो स्पष्ट छ कि हामी यस्तो स्थितिमा छौं जहाँ हामीलाई प्रतिक्रिया दिने अधिकार छैन र जब हामी प्रतिक्रिया दिन्छौं त्यो राम्रो ठानिदैन।’
यद्यपी सिमोन घरेलु समर्थकहरूबाट 'पुरै खेलभरि अपमान' भएकोमा दु:खी थिए।
उनले थपे, ‘आज हामी रंगशालामा जातीय भेदभाव र अपमान विरुद्ध लड्छौं, त्यसरी नै हामी व्यवस्थापकहरूको तर्फबाट पनि लड्न सक्छौं, जुन अपमान हामीले पुरै खेलभरि भोगेका थियौं। हामी जुन स्थितिमा छौं त्यसमा रहनु र पुरै खेलभरि अपमान सहनु सजिलो छैन। मैले तेस्रो गोल भएको देखें र म फर्किएँ, अपमान जारी रह्यो।’
अपमानको प्रकृतिबारे सोध्दा उनले जवाफ दिए, ‘साँचो कुरा त मलाई ठ्याक्कै याद छैन। मेरो प्रतिक्रिया न्यायोचित छैन तर ९० मिनेटसम्म अपमानित हुनु कस्तो हुन्छ थाहा छ? म आशा गर्दछु कि लिभरपुलले त्यो पक्षमा सुधार गर्न सक्छ।’
खेलमा लिभरपुलले एन्डी रबर्टसन र मोहम्मद सलाहको ६ मिनेटभित्र दुई गोल गर्दै लिभरपुललाई सुरुवाती अग्रता दिलाएका थिए।
यद्यपी एट्लेटिकोले पुनारागमन गर्दै दुई गोल फर्काएको थियो। उसका लागि मार्कोस लोरेन्टेले दुई गोल गरेर बराबरी गरेका थिए। तर भान डाइकले दोस्रो हाफको इन्जुरी समयमा शक्तिशाली हेडर मार्फत् निर्णायक तेस्रो गोल गरेर लिभरपुललाई जित दिलाए।
-1758107792.jpg)
-1746009348.jpg)
