नेपालका मनिष तिम्सिना अफगानिस्तान फुटबल टोलीको गोलकिपिङ प्रशिक्षकमा नियुक्त भएका छन्।
तिम्सिनाले आफूले अफगानिस्तानको सिनियर पुरुष फुटबल टोलीको गोलकिपिङ प्रशिक्षकको रूपमा काम सुरू गरेको जानकारी दिए।
हाल उनी अफगानिस्तानको प्रशिक्षणका लागि ताजिकिस्तानमा रहेका छन्।
अफगानिस्तानले यहि महिना सेन्ट्रल एसियन फुटबल एसोसिएसनको २०२५ काफा नेसन्स कप खेल्दैछ। यो प्रतियोगितामा अफगानिस्तान समूह ‘बी’ मा छ।
समूहमा घरेलु टोली ताजिकिस्तानसँगै इरान, भारत र अफगानिस्तान छन्। अर्को समूहको खेल उज्वेकिस्तानमा हुँदैछ।
प्रशिक्षक मनिष एएफसी गोलकिपिङ ‘ए’ डिप्लोमा लाइसेन्स प्राप्त गर्ने पहिलो नेपाली हुन्। उनले २०८० मा यो लाइसेन्स प्राप्त गरेका थिए।
मनिषले तीन वर्ष भारतको आइलिग क्लब गोकुलम केरलाको गोलकिपर प्रशिक्षकको रूपमा काम गरेका थिए। आइ लिगमा काम गर्ने पहिलो नेपाली प्रशिक्षक बनेका मनिषले उपाधि जित्ने अर्को इतिहास बनाएका थिए।
अब उनले दोस्रो देशको राष्ट्रिय टोलीको प्रशिक्षक बनेर अर्को इतिहास बनाएका छन्।
मनिषले नेपाली राष्ट्रिय फुटबल टोलीसँग पनि काम गरेका छन्।
उनी गत वर्ष नेपाली राष्ट्रिय टोलीको गोलकिपिङ प्रशिक्षक बनेका थिए। विश्वकप छनोटको तयारीका क्रममा गत वर्ष एन्फाले उनलाई गोलकिपिङ प्रशिक्षक नियुक्त गरे पनि उनी लामो समय टोलीमा रहेनन्।
-1746009348.jpg)
