साफ च्याम्पियनसिपअन्तर्गत नेपालले भोलि सोमबार श्रीलंकासँग प्रतिस्पर्धा गर्दैछ। खेल नेपाली समयअनुसार राति ९:४५ बजे हुनेछ।
खेलअघि नेपालका प्रशिक्षक अब्दुल्लाह अलमुताइरीले जितका लागि खेल्ने बताएका छन्। उनले भने, ‘श्रीलंका बलियो टिम हो। बंगलादेशविरुद्ध पनि उनीहरूले राम्रो खेलेका थिए,’ उनले भने, ‘हामीले भोलिको खेल जित्नु पर्छ।’
उद्घाटन खेलमा आयोजक माल्दिभ्सलाई हराउँदा खुसी भएको बताउँदै अहिलेका लागि त्यो खेल बिर्सेको उनको भनाइ छ।
‘खुसी छौं तर अहिले त्यो खेल बिर्सनु पर्छ। हामी श्रीलंकाविरुद्धको खेलमा केन्द्रीत छौं,’ उनले भने।
श्रीलंका आक्रामक टिम भएकाले नेपालले त्यसको फाइदा उठाउनु पर्ने अलमुताइरीको भनाइ छ।
‘श्रीलंकाविरूद्धको खेल हामीलाई सहज हुनेछैन। श्रीलंका आक्रामक फुटबल खेल्छ। हाम्रो लक्ष्य उनीहरूको एक खेलाडीलाई बाहिर पठाउने हुनेछ। त्यसले हामीलाई सहज हुनेछ। उनीहरू निकै आक्रामक छन्, त्यसको फाइदा लिने कोशिस गर्छौं।’
उनले भने, ‘श्रीलंकाले बंगलादेशविरुद्धको खेलमा ६७ ट्याकल गरेको थियो। ती मध्ये २३ वटा फल थिए। यदि भोलि श्रीलंकाका एक खेलाडीले दुई गलत ट्याकल गरे रातो कार्ड हुन्छ। हामी यसको फाइदा लिन कोशिस गर्छौं।’
नेपालका कप्तान किरणकुमार लिम्बुले पनि श्रीलंकासँग जितका लागि खेल्ने बताए।
यसअघि नेपालले शुक्रबार राति भएको खेलमा घरेलु टिम माल्दिभ्सलाई १-० गोलले पराजित गरेको थियो।
नेपालको जितमा मनिष डाँगीले निर्णायक गोल गरेका थिए।
यसपटकको साफमा नेपालसहित भारत, बंगलादेश, श्रीलंका र आयोजक माल्दिभ्स गरी पाँच टिमबीच प्रतिस्पर्धा हुनेछ।
पाँच टिमले एक आपसमा खेलेपछि शीर्ष दुई टिमबीच उपाधि भिडन्त हुनेछ।
साफमा नेपालको खेल
नेपाल भर्सेस माल्दिभ्स - असोज १५ गते - राति ९:४५ बजे (नेपाल १-० ले विजयी)
नेपाल भर्सेस श्रीलंका - असोज १८ गते - राति ९:४५ बजे
नेपाल भर्सेस भारत - असोज २४ गते - राति ९:४५ बजे
नेपाल भर्सेस बंगलादेश - असोज २७ गते - अपरान्ह ४:४५ बजे
-1746009348.jpg)
