नेपाली यू–२० महिला टोलीका प्रशिक्षक यम गुरुङले सेट पिसमा गोल गर्ने योजना सफल नहुँदा र खेलाडीमा धेरै थकानले गर्दा साफ यू–२० महिला च्याम्पियनसिपको उपाधि जित्न असफल भएको बताएका छन्।
बंगलादेशमा सोमबार सम्पन्न यू–२० महिला च्याम्पियनसिपमा यसपल्ट पनि उपविजेतामै सीमित भएको नेपाली टोली मंगलबार स्वदेश फर्किएको छ।
त्रिभुवन अन्तर्राष्ट्रिय विमानस्थलमा प्रशिक्षक गुरुङले अन्तिम खेलमा जित्नैपर्ने दबाब र पाँचवटा खेल २४ घण्टाको अन्तरमा खेल्नुपर्दा खेलाडीमा थकान रहेकाले सोचेअनुरूप प्रदर्शन हुन नसकेको बताए।
धेरै राम्रो रहेको बंगलादेशको टोलीविरुद्ध खेल्दा आफ्ना खेलाडीले राम्रो आराम गर्न नपाउनुले समस्या भएको प्रशिक्षक गुरुङको भनाइ छ। विपक्षी आफूहरूभन्दा बिल्डअपमा धेरै राम्रो रहेकाले सेट पिसमा ध्यान दिएर खेले पनि त्यसमा सफल नभएको प्रशिक्षक गुरुङ बताउँछन्।
निर्णायक खेलमा घरेलु टोली बंगलादेशसँग ४–० ले पराजित हुँदा नेपाली टोली चार राष्ट्र रहेको च्याम्पियनसिपमा उपविजेतामै सीमित भएको थियो।
प्रशिक्षक गुरुङले विपक्षी टोलीसँग सातजना राष्ट्रिय टोलीको सदस्य रहँदा उनीहरूले त्यसको सदुपयोग गरेको पनि उल्लेख गरे।
बंगलादेशको अनुभवी खेलाडी, होम ग्राउन्ड र आफ्ना खेलाडी थकित हुँदा अन्तिम खेलको नतिजामा धेरै फरक परेको उनको बुझाइ छ।
उनले ट्याक्टिकल समस्याभन्दा पनि थकान हुँदा मसल टाइट भएपछि राम्रोसँग खेल्न नसकेको दाबी गरे। उपाधिविहीन भए पनि ठूलो दर्शकका माझ कसरी खेल्ने भन्नेबारे खेलाडीले सिकेको प्रशिक्षक गुरुङले बताएका छन्।
उनले पूर्णीमा राई, मीना देउवा, बिर्सना चौधरी, सुक्रिया मिया, सेनु परियार र सिमरन राई जस्ता खेलाडी छिट्टै राष्ट्रिय टोलीमा आउन सक्ने आशा व्यक्त गरेका छन्।
यद्यपि पूर्णीमाले पहिलो तीन खेलजस्तो बाँकी दुई खेलमा प्रदर्शन गर्न नसकेको पनि उल्लेख गरेका छन्। राम्रोसँग आराम गर्न नपाउँदा खेलाडीहरू थकित भएकाले सोचेअनुरूप नतिजा आउन नसकेको उनी बताउँछन्। त्यहाँको मौसम र खानपानले गर्दा पनि खेलाडीहरूका लागि सहज नभएको प्रशिक्षक गुरुङले उल्लेख गरेका छन्। —न्युज एजेन्सी नेपाल
-1746009348.jpg)
