नेपाली राष्ट्रिय फुटबल टिमका मुख्य प्रशिक्षक अब्दुल्लाह अलमुताइरीले विश्वकप तथा एसियन कप छनोटअन्तर्गत बिहीबार चाइनिज ताइपेईविरुद्धको खेल कठिन हुने बताएका छन्।
भर्चुअल प्रि-म्याच सम्मेलनमा बोल्दै उनले बिहीबारको खेल दुवै टिमका लागि गाह्रो हुने बताएका हुन्।
'कुवेतको मौसममा खेल्न सजिलो छैन। त्यसैले दुवै टिमका लागि गाह्रो हुनेछ,' कुवेती नागरिक अलमुताइरीले भने।
गत शनिबार इराकविरुद्धको मैत्रीपूर्ण खेलमा हार बेहोरेपनि सो खेल नेपालका लागि सकारात्मक पक्ष भएको उनको भनाइ छ।
'हामी समूहमा चौथो स्थान पक्का गर्दै एएफसी एसियन कप छनोटमा अवसर पाउन चाहान्छौ। त्यसका लागि हामीले भोलिको खेलमा जितको लागि खेल्नु पर्नेछ,' उनले भने।
उनले युवा नेपाली टिममा धैर्यता हुनुपर्ने दोहोर्याए। 'हामीले छनोटको तयारी गर्न धेरै मैत्रीपूर्ण खेल खेलेका छैनौ। हामीसँग प्रतिभाशाली युवा खेलाडीले भरिएको टिम छ। त्यसैले हामीले खेलाडीहरूलाई अघि बढ्न साथ दिनुपर्छ,' उनको भनाइ छ।
ताइपेईमा नयाँ खेलाडी र नयाँ प्रशिक्षक हुनु पनि चिन्ताको विषय भएको उनले बताए।
नेपालविरुद्धको खेलअघि ताइपेईका प्रशिक्षक भोम काहुमले पनि कुवेतको गर्मीमा खेल्न गाह्रो हुने बताए।
'कुवेतको मौसममा भिज्न गाह्रो भइरहेको छ। हाम्रो मुख्य चुनौती नै यहाँको मौसम भइरहेको छ,' उनले भने।
नेपाली टिम सन्तुलित भएको बताउँदै उनले नेपाल रक्षापंक्ति र अग्रपंक्तिमा राम्रो भएको बताए।
'हाम्रा मुख्य खेलाडी र विदेशमा खेलिरहेका खेलाडी कोभिडको कारण टिममा छैनन्। नयाँ खेलाडीले आफूलाई प्रमाणित गर्ने आसा गरेको छु,' उनले भने।
नेपाल र ताइपेईबीच भोलि बिहीबार नेपाली समयअनुसार राति ९:४५ बजे बजे कुवेतको अल-हमाद अन्तर्राष्ट्रिय रंगशालामा प्रतिस्पर्धा हुनेछ।
ताइपेईसँग खेलेपछि नेपालले २४ जेठमा जोर्डन र २८ जेठमा अस्ट्रेलियासँग प्रतिस्पर्धा गर्नेछ।
नेपाली टिम
गोलकिपर : किरणकुमार लिम्बु (कप्तान), दीप कार्की, विशाल सुनार
डिफेन्डर : रोहित चन्द, अनन्त तामाङ, दिनेश राजवंशी, गौतम श्रेष्ठ, विकास खवास, सुमन अर्याल
मिडफिल्डर : मनिष डाँगी, कमल थापा, एरिक विष्ट, विशाल राई, सुनील बल, सन्तोष तामाङ, सुरज ज्यू ठकुरी, आयुष घलान, पुजन उपरकोटी
फरवार्ड : अभिषेक रिजाल, नवयुग श्रेष्ठ, आशिष लामा, सुमन लामा, अन्जन विष्ट
सम्बन्धित समाचारहरू :-
एसियन कपको तेस्रो चरण पुग्न नेपालका लागि ताइपेईविरुद्धको खेल महत्वपूर्ण
नेपाल भर्सेस चाइनिज ताइपेई : यस्तो छ दुवै टिमको पछिल्ला खेलको नतिजा
नेपाल एसियन कप २०२३ मा यसरी छनोट हुन सक्छ
-1746009348.jpg)
