बार्सिलोनाका अध्यक्ष जोन लोपोर्टाले अर्जेन्टाइन फरवार्ड लिओनल मेसीसँग सम्झौता नवीकरणका लागि प्रस्ताव गर्ने बताएका छन्।
३३ वर्षीय मेसी र बार्सिलोनाबीच यहीँ जुनमा सम्झौता सकिँदैछ।
लोपोर्टाले मेसीलाई उचित प्रस्ताव गर्ने र उनले प्रस्ताव स्विकार गर्ने विश्वास व्यक्त गरेका छन्।
मेसीले अगस्ट २०२० मा आफूले बार्सिलोना छाड्न चाहेको भन्दै फ्याक्स पठाएका थिए। मेसी सन् २००० देखि बार्सिलोनामा आबद्ध छन्।
तर बार्सिलोनाले ७०० मिलियन युरोको रिलिज क्लज पूरा भए मात्र मेसीले क्लब छाड्न सक्ने बताएको थियो। जसका कारण मेसी अन्य क्लबमा आबद्ध हुने बाटो बन्द भएको थियो।
मेसीले यो सिजनमा बार्सिलोनाका लागि अन्तिम खेल खेलेका थिएनन्। उनी कोपा अमेरिकाअघि छुट्टी मनाउनका लागि जाँदा एइबारविरुद्धको खेल गुमाएका थिए।
यो सिजन बार्सिलोना ला लिगामा तेस्रो भयो। बार्सिलोना २००८ पछि ला लिगामा तेस्रो भएको हो।
बार्सिलोना तेस्रो भए पनि मेसी ला लिगाको सर्वाधिक गोलकर्ता बनेका थिए।
-1746009348.jpg)
