नेपाल सुपर लिग (एनएसएल) ले अनुशासनहिन व्यबहार देखाएको भन्दै विराटनगर सिटी एफसी र क्लबका पदाधिकारीमाथि कारबाही गरेको छ।
एनएसएलले विराटनगर सिटी र ललितपुर सिटी एफसीबीच दशरथ रंगशालामा गत ८ मेमा भएको खेलका दौरान विराटनगर सिटीका प्रशिक्षक यान ल र पदाधिकारीले खेल भावनाबिपरितको व्यबहार प्रदर्शन गरेको ठहर गरेको हो।
प्राविधिक साझेदार अखिल नेपाल फुटबल संघ (एन्फा) सँगको छलफल र खेलको अनुसन्धानपछि कारबाही गर्ने निर्णय गरेको एनएसएलको भनाइ छ।
खेल भावना विपरितको व्यवाहार हुनुमा व्यवस्थापन दोषी भएको ठहर गर्दै एनएसएलले विराटनगर सिटीलाई १ लाख रुपैयाँ जरिमाना गरेको छ।
यस्तै प्रशिक्षक यान ललाई ५० हजार रुपैयाँ जरिमाना र एक सिजन एनएसएलमा प्रतिबन्ध लगाइएको छ। भारतीय प्रशिक्षक यानले ललितपुरविरुद्धको खेलमा खेलाडीहरुलाई मैदान छाड्न निर्देशन दिएका थिए।
प्लेअफमा पुग्न जित्नै पर्ने खेलमा ललितपुरसँग पहिलो गोल खाएसँगै यान रेफ्रीमाथि आक्रोसित बनेका थिए। ४-० गोलले पराजित भएको खेलमा विराटनगरले दोस्रो हाफमा दोस्रो गोल खाएसँगै यानले खेलाडीलाई मैदान छाड्न भनेका थिए। जसमा विराटनगरका पेड्रो मान्जीबाहेक सबै खेलाडीले मैदान छाडेका थिए। १० मिनेटपछि खेल फेरि सुचारू भएको थियो।
एनएसएलले खेल भावनाबिपरित खेल समाप्त नभइ खेलाडीलाई मैदान छाड्न निर्देशन दिएकोमा प्रशिक्षक यानलाई मुख्य दोषी ठहर गरेको छ। यस्तै उनले पटक पटक टचलाइन क्रस गरेकोमा पनि दोषी ठहर गरिएको छ। प्रशिक्षक यानले रेफ्रीमाथि अपमानजन भाषा प्रयोग गरेर अनुशासन तोडेको एनएसएलको भनाइ छ।
विराटनगरका प्राविधिक निर्देशक सोनाम घले, सहायक प्रशिक्षक निशान श्रेष्ठ, सहायक व्यवस्थापक मिलन गुरुङलाई पनि कारबाही गरिएको छ। उनीहरूमा अनुशानसको कमी रहेको भन्दै ३-३ खेल प्रतिबन्ध लगाइएको छ।
-1746009348.jpg)
