गत नोभेम्बरमा बंगलादेशविरुद्धको मैत्रीपूर्ण खेलका लागि घोषणा गरिएको नेपाली राष्ट्रिय टिममा फरवार्ड आशीष लामा पनि थिए। कोरोना भाइरसको महामारीको अवस्थामा भएको उक्त खेल नेपाली खेलकुदका लागि महत्वपूर्ण थियो। लामो समयपछि नेपाली खेलाडी मैदानमा उत्रन पाउँदा उत्साहित थिए।
'कोरोनाका कारण लामो समयपछि खेल हुँदै थियो। त्यसैले सो खेलका लागि उत्साहित थिएँ,' लामाले द एन्फा डट कमसँग कुरा गर्दै भनेका छन्।
तर बंगलादेश उड्नुअघि लामाका 'रुममेट'लाई कोरोना भाइरसको संक्रमण भयो। जसका कारण उनी बंगालदेश उड्नुको सट्टा आइसोलेसनमा बस्नुपर्यो।
'मेरो रुममेटलाई कुनै लक्षण नदेखिए पनि कोरोना पोजेटिभ देखियो। त्यसैले म कन्ट्याक्ट ट्रेसिङमा परेकाले बंगलादेश आइसोलेसनमा बस्न पर्यो,' उनले भने।
राष्ट्रिय टिमबाट खेल्ने सपना तुहिएपछि लामाले राष्ट्रिय टिमबाट खेल्नका लागि उचित समय पर्खे।
लामा एक वर्षपछि राष्ट्रिय टिममा फर्किएका छन्। उनी इराकसँगको मैत्रीपूर्ण खेल र विश्वकप छनोटका लागि मंगलबार राष्ट्रिय टिमसँगै इराक जाँदैछन्।
डिसेम्बर १९९६ मा नुवाकोटको गेर्खुमा जन्मिएका लामा सात वर्षको उमेरमा बुबासँग काठमाडौं आएका थिए।
काठमाडौं आएपछि उनी विश्व निकेतन स्कुल कोटेश्वरमा भर्ना भए।
'त्यति बेला मैले दशरथ रंगशालामा गएर फुटबल खेले हेरेँ। खेल हेरेपछि मेरो फुटबलप्रतिको मोह बढ्यो,' उनले भने।
सुरुमा उनले स्कुलस्तरीय प्रतियोगितामा खेले। त्यसपछि उनले एनआरटीको यु-१४ टिमबाट खेले। एनआरटीबाट उमेर समूहका प्रतियोगिता खेलेपछि उनी टुसाल युवा क्लबमा आबद्ध भए। त्यसपछि ब्वाइज युनियन क्लब, हिमलयन शेर्पा क्लब हुँदै मनाङ मर्स्याङ्दी क्लबमा आबद्ध भए।
मनाङपछि सशस्त्र प्रहरी बलको एपिएफ क्लबमा आबद्ध भएपछि उनको करिअरले उचाइ लियो। उनी एपिएफका मुख्य फरवार्डको रुपमा स्थापित भए।
एपिएफबाट सफल पोखरा कप खेल्दा राष्ट्रिय टिमका तत्कालिन प्रशिक्षक योहान कालिनले लामाको खेललाई मन पराए। त्यसपछि कालिनले कुवेतविरुद्ध सन् २०१९ मा खेलिएको राष्ट्रिय टिममा लामालाई स्थान दिए। उनले कुवेतविरुद्ध खेलिएका दुई मैत्रीपूर्ण खेलमा नेपालको प्रतिनिधित्व गरे।
'पहिलो मैत्रीपूर्ण खेलमा बेन्चमा बसेँ। त्यसपछि कालिनले दोस्रो खेलअघिको डिनरमा मौका दिने बताए। त्यसपछि मेरो राष्ट्रिय टिमबाट खेल्ने सपना पूरा भयो,' उनले भने।
लामाले फुटबलरको करिअरमा सुनौलो दिनजस्तो अरू नहुने बताए।
"मैले धेरै क्लबहरूको लागि खेलेँ, स्ट्राइकरको रूपमा बुझ्दा मानिसहरूले तपाईँलाई गोल गरेपछि याद गर्नेछन् र चिन्नेछन्,' उनले भने।
करिअरको उच्चबिन्दूमा पुगेपछि सबै जना नम्र हुनु पर्ने लामाको सुझाव छ।
लामा २०७६ को सहिद स्मारक ए डिभिजन लिगमा सर्वाधिक गोलकर्ता बनेका थिए। उनले त्यतिबेला नौ गोल गरेका थिए।
'हामी सबै चुनौतीहरूको सामना गर्न दृढ हुनुपर्छ किनकि फुटबलमा राम्रो र खराब दुवै समय आउँछन्। साथै हामीले उपलब्धीहरूलाई टाढा राख्न हुँदैन,' उनले भने, "माथि पुगेपछि तल झर्नुपर्छ, तपाईं माथि भएको बेला अहंकारी हुनुहुन्न।'
उनले फुटबलमा आउन चाहनेहरूले कडा परिश्रम गर्नुपर्ने र असफल भए पनि परिश्रम गर्न छाड्न नहुने सुझाव दिए।
लामाले आफू अझै पनि सिकाइँको प्रक्रिया रहेको बताए।
-1746009348.jpg)
