एट्लेटिको म्याड्रिडले सिजनको ला लिगाको उपाधि जितेको छ। शनिबार भएको सिजनको अन्तिम खेलमा रियल भलडोलिडलाई २-१ गोलले पराजित गर्दै एट्लेटिको च्याम्पियन बनेको हो।
खेलमा अग्रता भने भलडोलिडले लिएको थियो। उसका लागि प्लानोले १८ मिनेटमा गोल गरेका थिए।
खेलमा १-० ले पछि परेपछि दबाबमा आएको एट्लेटिकोले दोस्रो हाफमा उत्कृष्ट पुनरागमन गर्न सफल भयो। उसका लागि ५७ मिनेटमा कोरिआले बराबरी गोल फर्काउन सफल भए। उनले कारास्कोको पासमा गोल गरेका थिए।
एट्लेटिकोले खेलको ६७ मिनेटमा अग्रता लिन सफल भयो। लुइस सुआरेजले गोल गर्दै एट्लेटिकोलाई उपाधितर्फ अघि बढाएका थिए।
यो सिजन बार्सिलोनाबाट एट्लेटिकोमा आबद्ध भएका सुआरेजले सिजनमा ३२ खेलमा २१ गोल गरे। उनले स्पेनमा पछिल्लो ७ सिजनमा ५ लिग उपाधि जितेका छन्।
एट्लेटिकोले सन् २०१४ पछि पहिलो पटक र समग्रमा ११औं पटक ला लिगाको उपाधि जितेको हो।
खेलमा एट्लेटिको म्याड्रिड पराजित वा बराबरीमा रोकिएको अवस्थामा रियल म्याड्रिडलाई उपाधि जित्ने अवसर थियो।
त्यसका लागि रियलले भने खेल जित्नु पर्ने थियो। रियलले खेल पनि जित्यो। तर एट्लेटिकोको जितले रियलको उपाधि रक्षा गर्ने अभियान सफल भएन।
रियलले अन्तिम खेलमा भिल्लारियलमाथि २-१ को जित निकाल्यो। १-० ले पछि परेको अवस्थामा रियलका लागि बेन्जिमाले ८७ मिनेट र मोड्रिकले दोस्रो हाफको इन्जुरी टाइमको दोस्रो मिनेटमा गोल गरेका थिए।
यता सिजनको अन्तिम खेलमा बार्सिलोनाले जित निकाल्यो। एन्टोनी ग्रिजम्यानको गोलमा बार्सिलोनाले एइबारलाई १-० गोलले पराजित गर्यो।
उपाधि जितेको एट्लेटिकोले ३८ खेलबाट ८६ अंक जोड्यो। दोस्रो बनेको रियलले ८४ अंक तथा तेस्रो भएको बार्सिलोनाले ७९ अंक बटुले।
-1746009348.jpg)
