जर्मन क्लब वायर्न म्युनिखका पोलिस स्ट्राइकर रोबर्ट लेवान्डोस्कीले अर्को रेकर्ड बनाएका छन्।
शनिबार जर्मन बुन्डेस लिगाअन्तर्गत एफसी अग्सवर्गविरुद्धको खेलमा गोल गर्दै लेवान्डोस्कीले सिजनमा ४१ गोल पूरा गरे। यो खेल सिजनको अन्तिम खेल थियो।
जससँगै उनले बुन्डेस लिगाको एकै सिजनमा सर्वाधिक गोल गर्ने गर्ड मुलरको रेकर्ड भंग गरे। लेवान्डोस्कीले सिजनको २९ लिग खेल्दै ४१ गोल पूरा गरेका हुन्।
यसअघि मुलरले सन् १९७२ को सिजनमा ४० गोल गरेर रेकर्ड बनाएका थिए।
लेवान्डोस्कीले पछिल्ला २० बुन्डेस लिगाका खेलमा १९ खेलमा गोल गरेका छन्। उनले योबीचमा हेर्था बर्लिनविरुद्ध गत ५ फेब्रुअरीमा भएको खेलमा भने गोल गर्न सकेका थिएनन्।
लेवान्डोस्की २०१५-१६ को सिजनपछि युरोपका शीर्ष पाँच लिगमध्येमा ४० गोल पूरा गर्ने पहिलो खेलाडी बने।
सन् २०१५-१६ को सिजनमा बार्सिलोनाका लागि खेल्दै लुइस सुआरेजले स्पेनिस ला लिगामा ४० गोल पूरा गरेका थिए।
लेवान्डोस्कीले सिजनमा लिगसहित सबै प्रतियोगितामा गरी ४६ खेलमा ५३ गोल गरिसकेका छन्।
लेवान्डोस्कीले सिजनको अन्तिम खेलको अन्तिम मिनेटमा गोल गरे। लिगको उपाधि जितिसकेको वायर्नले अन्तिम खेलमा अग्सवर्गलाई ५-२ गोलले पराजित गर्यो।
वायर्नले यसअघि नै उपाधि जितिसकेको थियो। यो सिजनमा उपाधि जितेसँगै वायर्न लगातार नवौं सिजनमा च्याम्पियन बनेको थियो।
-1746009348.jpg)
