इराकविरुद्धको मैत्रीपूर्ण खेल र विश्वकप छनोटका लागि नेपाली राष्ट्रिय फुटबल टिम घोषणा गरिएको छ।
प्रमुख प्रशिक्षक अब्दुल्लाह अलमुताइरीले मंगलबार टिमको टुंगो लगाएको अखिल नेपाल फुटबल संघ (एन्फा) ले जनाएको छ।
बन्द प्रशिक्षणमा रहेका ९ खेलाडीलाई बाहिर राख्दै २३ सदस्यीय नेपाली टिम घोषणा गरिएको हो।
जसमा अनुभवी फरवार्ड भरत खवास र डिफेन्डर रन्जित धिमाल टिममा परेका छैनन्। यस्तै अमित तामाङ, सेसेहाङ आङ्देम्बे र रविशंकर पासवान पनि टिममा अटाउन सकेनन्।
निशान खड्का, विकेक बस्नेत, नितिन थापा र दर्शन गुरुङ पनि अन्तिम टिममा परेका छैनन्।
टिममा ६ खेलाडीले पहिलो पटक स्थान पाउँदा गत महिना नेपालले थ्री नेसन्स कप जितेका १० खेलाडी मात्र टिममा परेका छन्।
थ्री नेसन्स कप खेलेका किरणकुमार लिम्बु, दीप कार्की, रोहित चन्द, अनन्त तामाङ, दिनेश राजवंशी, एरिक विष्ट, सुनील बल, विशाल राई, अन्जन विष्ट र अभिषेक रिजाल टिममा छन्।
थ्री नेसन्स कप जित्दाको टिममा रहेका गोलकिपर विकेश कुथुसहित डिफेन्डरहरू रन्जित धिमाल, निशान खड्का, विराज महर्जन, अजित भण्डारी, छिरिङ गुरुङ, मिडफिल्डरहरू त्रिदेव गुरुङ, सुजल श्रेष्ठ, तेज तामाङ, सन्जोक राई, रविशंकर पासवान, फरवार्डहरू दर्शन गुरुङ र भरत खवास टिममा छैनन्।
गोलकिपर विशाल सुनारसँगै कमल थापा, सुरज ज्यू ठकुरी, गौतम श्रेष्ठ, आयुष घलान र मनिष डाँगी पहिलो पटक टिममा परेका छन्।
यसअघि प्रशिक्षक अलमुताइरीले ३२ सदस्यीय प्रारम्भिक टिममा पनि आठ खेलाडी परिवर्तन गरेका थिए।
नेपालले आगामी जेठ १५ मा सन् २००७ को एएफसी एसियन कप च्याम्पियन इराकसँग मैत्रीपूर्ण खेल खेल्दैछ। खेल इराकको बश्रा रंगशालामा हुनेछ।
विश्वकप तथा एसियन कपको छनोटको तयारीका क्रममा मैत्रीपूर्ण खेल हुन लागेको हो।
नेपाल र इराकबीच यसअघि तीन पटक प्रतिस्पर्धा भएको छ। तीनै खेलमा इराक विजयी भएको थियो। पछिल्लो पटक २००१ मा भएको विश्वकप छनोटमा इराकले नेपाललाई ४-२ गोलले पराजित गरेको थियो।
फिफा वरीयतामा नेपालभन्दा इराक १०३ स्थान माथि छ। इराक विश्व वरीयतामा ६८औं स्थानमा छ भने नेपाल १७१औं स्थानमा छ।
इराकसँग प्रतिस्पर्धा गरेपछि नेपाली टिम कुवेत प्रस्थान गर्नेछ।
नेपालले फिफा विश्वकप २०२२ तथा एएएफसी एसियन कप २०२३ को दोस्रो चरणमा प्रतिस्पर्धा गरिरहेको छ। समूह 'बी' रहेको नेपाल ३ अंक जोड्दै चौथो स्थानमा छ। समूहमा नेपालभन्दा पछि चाइनिज ताइपेई छ।
समूहको शीर्ष स्थानमा १२ अंक जोडेको अस्ट्रेलिया छ। दोस्रो स्थानको कुवेत र तेस्रो स्थानको जोर्डनको समान १०-१० अंक छ।
छनोटअन्तर्गत नेपालले आगामी जुन पहिलो साता जोर्डन, अस्ट्रेलिया र चाइनिज ताइपेईसँग खेल्न बाँकी छ। समूहका सबै खेल कुवेतमा हुनेछन्।
नेपालले पहिलो खेल ताइपेईसँग ३ जुनमा, दोस्रो खेल जोर्डनसँग ७ जुन र तेस्रो खेल ११ जुनमा अस्ट्रेलियासँग खेल्नेछ।
नेपाली टिम
गोलकिपर : किरणकुमार लिम्बु (कप्तान), दीप कार्की, विशाल सुनार
डिफेन्डर : रोहित चन्द, अनन्त तामाङ, दिनेश राजवंशी, गौतम श्रेष्ठ, विकास खवास, सुमन अर्याल
मिडफिल्डर : मनिष डाँगी, कमल थापा, एरिक विष्ट, विशाल राई, सुनील बल, सन्तोष तामाङ, सुरज ज्यू ठकुरी, आयुष घलान, पुजन उपरकोटी
फरवार्ड : अभिषेक रिजाल, नवयुग श्रेष्ठ, आशिष लामा, सुमन लामा, अन्जन विष्ट
-1746009348.jpg)
