स्थानीय खेलमा रेफ्रीमाथि कुटपिट गर्ने ६ खेलाडी र एक प्रशिक्षकलाई मोरङ जिल्ला फुटबल संघले प्रतिबन्ध लगाएको छ।
उनीहरूलाई नेपालभर खेल्न नपाउने गरी कारबाही गरिएको जिल्ला संघका अध्यक्ष दिपेन्द्र धिमालले जनाएका छन्।
प्रतिबन्धमा पर्ने खेलाडीमा राज तामाङ, सनम मुडीयारी, सोनम कार्की र पुस्कार राई छन्। उनीहरूलाई २ वर्ष प्रतिबन्ध लगाइएको छ। यस्तै खेलाडीहरू आकास धिमाल र सनम तामाङलाई १२ महिनाको प्रतिबन्ध लगाइएको छ।
प्रशिक्षक साजन खाम्बा लिम्बुलाई संघले १८ महिनाको प्रतिबन्ध लगाउने निर्णय गरेको छ।
मोरङ जिल्ला फुटबल संघका अनुसार पथरी शनिश्चरे भुटानी सिविरले संचालन गरेको वडा स्तरीय फुटबल प्रतियोगिताका दौरान रेफ्री र सहायक रेफ्रीमाथि मंगलबार कुटपिट भएको थियो।
वडा नम्बर १० र पथरी सिविरबीच भएको खेल सकिए पश्चात् वडा नम्बर १० खेलाडीले खेल मैदानमै सहायक रेफ्री र रेफ्रीलाई कुटपिटका साथै अभद्र व्यवहार गरेको संघको भनाइ छ।
साथै सो खेलमा सुरक्षा दिन नसकेको कारणले आयोजकलाई ११ हजार जरिमाना गरिएको छ।
खेलमा पथरी सिविरले वडा नम्बर १० लाई १-० ले पराजित गरेको थियो। त्यसपछि खेलाडीहरू रेफ्री मनिस खड्का र सहायक रेफ्री जमुना मगरमाथि कुटपिटमा उत्रिएका थिए। कुटपिटबाट जमुनाको टाउकोबाट रगत आएको थियो।
-1746009348.jpg)
