थ्री नेसन्स कपअन्तर्गत नेपालले बिहीबार दशरथ रंगशालामा किर्गिस्तान यु-२३ टिमसँग प्रतिस्पर्धा गर्यो।
६ वर्षपछि दशरथ रंगशालामा उत्रिएको नेपाली राष्ट्रिय टिमले नतिजा भने सोचे जस्तो निकाल्न सकेन।
नेपाली टिम किर्गिस्तानको ओलम्पिक टिमसँग गोलरहित बराबरीमा रोकियो। अझ किर्गिस्तान अन्तिम ३० मिनेट १० खेलाडीमा सीमित भएको थियो।
अब नेपालले शनिबार बंगलादेशसँग प्रतिस्पर्धा गर्नेछ। सो खेलमा कम्तिमा बराबरी खेले मात्र नेपालले सोमबार हुने फाइनलमा स्थान बनाउनेछ। पहिलो खेलमा किर्गिस्तानलाई हराएको बंगलादेश भने फाइनल पुगिसकेको छ।
बराबरीमा रोकिए पनि नेपालका प्रशिक्षक बालगोपाल महर्जन सन्तुष्ट छन्। उनले बंगलादेशविरुद्ध प्रदर्शनमा सुधार गरेर अंकका लागि खेल्ने बताएका छन्।
महर्जनले बिहीबार किर्गिस्तानको खेलपछि दिएको प्रतिक्रिया पढ्नुहोस् :-
नेपाली राष्ट्रिय फुटबल टिमले ६ वर्षपछि दशरथ रंगशालामा खेल्ने मौका पायो। आजको किर्गिस्तानविरुद्धको खेलमा सन्तुष्ट छु।
विगत तीन महिनादेखि तयारी गरेका थियौं। तीन महिनामा तयारीको दौरान कुनै पनि मैत्रीपूर्ण खेल्न नपाएको हुनाले आज नै टिमको परिक्षण गर्नु पर्ने अवस्था भयो। मैले खेलाडीलाई जस्तो खेल्न भनेको थिएँ, त्यो अनुसार खेलेका छन्।
खेल जित्नका लागि स्कोर हुनुपर्छ। त्यो स्कोर समयमै निस्किएन। हामीले धेरै नै अवसर गोल गर्ने सिर्जना गरेका थियौं। तर कताकता अट्याकिङ थर्डमा फरवार्डहरू चुकेको अवस्था रह्यो। अर्को खेलमा त्यसलाई सुधारेर राम्रो नतिजा ल्याउनेमा आशावादी छु।
मैले जुन सोचेर टिम घोषणा गरेको थिएँ, सन्तुष्ट छु। फरवार्ड, मिडफिल्डर मिलाएर जुन टिम छानेको छु, त्यो अहिलेको नेपालको वेस्ट टिम हो।
आज हामीले राम्रो नतिजाका लागि प्रयास गरेको हो। स्कोर मात्र ननिस्केको हो। हामीले लगभग ५-६ गोल हुने अवसर सिर्जना गर्न सक्यौं।
हामीले प्रतियोगिताअघि मैत्रीपूर्ण पाएको भए राम्रो हुन्थ्यो। त्यसैले आज नै मैत्रीपूर्ण खेल जस्तै भयो।
पहिलो खेल भएकाले कमजोरी भयो। त्यसलाई सुधार गर्दै लैजाने हो।
हामीले विपक्षीको क्षेत्रमा बल नपाएको पनि होइन। त्यो स्थानमा फरवार्डले धैर्यता अपनाउनु पर्ने थियो। तर त्यस्तो भएन।
किर्गिस्तानको टिम हामीभन्दा राम्रो हो। यु-२३ टिम भए पनि बलियो सोचेको थिएँ। तर तयारी नपुगेर हो कि अलि कमजोर देखियो।
अब शनिबार बंगलादेशविरुद्धको खेलमा अंक लिने हिसाबले खेल्छौं। अंक लिएर फाइनल पुग्ने हाम्रो लक्ष्य हुनेछ। उनीहरु र हाम्रो स्तर उस्तै भएकाले नतिजा जे पनि आउन सक्छ।
हामीले खेललाई विश्वकप छनोटको तयारीको रुपमा लिएका छौं। अहिले हामी ट्रायलको चरणमा छौं। हामीसँग अझ दुई तीन महिना बाँकी छ। कुन पक्षमा कमजोरी छ, हेर्छौ।
-1746009348.jpg)
