लिओनल मेसीले कीर्तिमान बनाएको खेलमा बार्सिलोनाले रियल सोसिडाडलाई पराजित गरेको छ।
आइतबार राति भएको स्पेनिस ला लिगाको खेलमा बार्सिलोनाले सोसिडाडलाई ६-१ गोलले पराजित गरेको हो। बार्सिलोनाको जितमा मेसी र सर्जिनो डेस्टले २-२ गोल गरे।
खेलको ३७ मिनेटमा ग्रिजम्यानको गोलबाट बार्सिलोनाले अग्रता लियो। ४३ मिनेटमा डेस्टले बार्सिलोनाको अग्रता दोब्बर पारे।
५३ मिनेटमा डेस्टले टिमका लागि तेस्रो र व्यक्तिगत दोस्रो गोल गरे।
मेसीले ५६ मिनेटमा गोल गर्दा बार्सिलोना ४-० ले अघि बढेको थियो। बार्सिलोनाका लागि डेम्बेलेले ७१ मिनेटमा पाँचौ गोल गरे। ८९ मिनेटमा मेसीले टिमका लागि छैटौं र व्यक्तिगत दोस्रो गोल गरे।
सोसिडाडविरुद्ध मैदान उत्रिएसँगै मेसी बार्सिलोनाका लागि सर्वाधिक खेल खेल्ने खेलाडी बनेका छन्। आइतबार मेसीले बार्सिलोनाबाट ७६८औं खेल खेले।
यसअघि मेसीले गत साता ७६७ औं खेल खेलेर जाभीको कीर्तिमान बराबरी गरेका थिए।
सन् २००४ मा डेब्यू गरे यता मेसीले बार्सिलोनाका लगि ६६३ गोल गरिसकेका छन्।
३३ वर्षीय मेसीले बार्सिलोनाबाट १७ वर्ष खेल्दा १० पटक ला लिगाको उपाधि जितिसकेका छन्। यस्तै चार पटक युरोपियन च्याम्पियन्स लिग जितेका उनले कुल ३४ ट्रफी उचालेका छन्।
मेसीको कीर्तिमानी खेलमा जित हात पारेसँगै बार्सिलोना अंक तालिकाको दोस्रो स्थानमा उक्लिएको छ।
बार्सिलोनाले २८ खेलबाट ६२ अंक जोडेको छ। शीर्ष स्थानको एट्लेटिको म्याड्रिडको ६६ अंक छ भने तेस्रो स्थानमा झरेको रियल म्याड्रिडको ६० अंक छ।
-1746009348.jpg)
