आगामी वैशाखमा हुने नेपाल सुपर लिग (एनएसएल) फ्रेञ्चाइज फुटबल प्रतियोगितामा सहभागी सात टिमले अक्सनमार्फत आ–आफ्नो टिममा खेलाडी भित्र्याएका छन्।
शुक्रबार भएको अक्सनमार्फत टिमले आफूले चाहेको खेलाडीका लागि बोली लगाएका थिए। अक्सनमा १ सय ४९ खेलाडी सहभागी भएका थिए।
अक्सनमा एक टिमले अधिकतम १५ लाख ५० हजार रुपैयाँ खर्च गर्न पाउने नियम थियो। न्यूनतम १० लाख रुपैयाँ खर्च गर्नै पर्ने प्रावधान थियो।
अक्सनमा सहभागी खेलाडीलाई ए, बी र सी श्रेणीमा विभाजन गरिएको थियो। जसमा ए श्रेणीको न्यूनतम मूल्य १ लाख र अधिकतम मूल्य २ लाख तोकिएको थियो।
यस्तै बी श्रेणीको न्यूनतम मूल्य ५० हजार राखिएको थियो। बी श्रेणीका खेलाडीको अधिकतम १ लाख २० हजार रुपैयाँ तोकिएको थियो।
सी श्रेणीका लागि न्यूतनम मूल्य २० हजार तोकिदा अधिकत मूल्य ७५ हजार रुपैयाँ थियो।
अक्सनमा पहिलो श्रेणीका आठ खेलाडी सर्वाधिक २ लाख रुपैयाँमा विभिन्न टिममा आबद्ध भएका छन्।
यो पनि : यी हुन् एनएसएलका सात टिमका मार्की खेलाडी
जसमा दिनेश राजवंशी (डिफेन्डर, धनगढी एफसी), विकास खवास (डिफेन्डर, एफसी चितवन), सुजल श्रेष्ठ (मिडफिल्डर, पोखरा थन्डर्स), एरिक विष्ट (मिडफिल्डर, ललितपुर सिटी एफसी), सुनील बल (मिडफिल्डर, विराटनगर सिटी एफसी), विशाल सुनुवार (गोलकिपर, एफसी चितवन) दीप कार्की (गोलकिपर,पोखरा थन्डर्स) र तेज तामाङ (मिडफिल्डर, काठमाडौं रेजर्स) मा २-२ लाख रुपैयाँमा भित्रिए।
एनएसएलमा सहभागी सात टिम मध्ये बुटवल लुम्बिनी एफसीमा मात्र अधिकतम दुई लाख मूल्यमा खेलाडी आबद्ध भएका छैनन्।
२ लाख मूल्य पाएका सबै खेलाडीलाई भित्र्याउन एक भन्दा बढी टिमले इच्छा देखाएका थिए। त्यसैले लक्की ड्रमार्फत खेलाडीको आबद्धता टुंगो लगाइएको थियो।
मार्की खेलाडी बाहेक ए श्रेणीमा रहेका राष्ट्रिय टिमका कतिपय खेलाडीलाई भने कुनै टिमले भित्र्याएनन्। पूर्वकप्तान विराज महर्जन, पुलिसका मिडफिल्डर रविशंकर पासवान, आर्मीका फरवार्ड जर्ज प्रिन्स कार्कीसहित छिरिङ गुरुङ, हेमन्त थापा मगर, सुवास गुरुङ, दिलेन मोक्तानलाई भित्र्याउन कुनै पनि टिमले इच्छा देखाएनन्।
एक टिममा बढीमा २० जना खेलाडी हुनेछन्। जसमा तीन जना विदेशी, एक मार्की र दुई स्थानीय खेलाडी हुनेछन्। बाँकी खेलाडी अक्सनबाट छनोट हुनेछन्।
आगामी वैशाख ११ देखि २५ गतेसम्म हुने प्रतियोगिताका खेल दशरथ रंगशालामा हुनेछन्। प्रतियोगिता सिंगल राउन्ड रोबिनको आधारमा संचालन हुनेछ।
-1746009348.jpg)
