नेपाल सुपर लिग (एनएसएल) टिम ललितपुर सिटी एफसीले अन्जन विष्टलाई मार्की खेलाडीको रुपमा अनुबन्धन गरेको छ।
ललितपुरको स्वामित्व लिएको भाटभटेनी सुपर मार्केटका कार्यकारी निर्देशक कल्याण गुरुङ र अन्जनले सम्झौतामा हस्ताक्षर गरेका छन्।
ललितपुरको प्रमुख खेलाडीका रुपमा आबद्ध हुन पाएकोमा अन्जनले खुसी व्यक्त गर्दै नयाँ यात्राका लागि उत्साहित भएको बताएका छन्।
नेपाली राष्ट्रिय टिमका नियमित सदस्य अन्जन मनाङ मर्स्याङ्दी क्लबबाट घरेलु फुटबल खेल्ने गर्छन्।
२२ वर्षीय अन्जनले सन् २०१४ मा फिलिपिन्सविरुद्धको खेलबाट राष्ट्रिय टिममा डेब्यू गरेका थिए। त्यसयता एन्फा एकेडेमीका उत्पादन अन्जनले राष्ट्रिय टिमबाट ३० खेल खेल्दा २ गोल गरेका छन्।
एनएसएलमा ललितपुरसँगै विराटनगर सिटी एफसी, काठमाडौं रेजर्स एफसी, एफसी चितवन, पोखरा थन्डर्स, बुटवल लुम्बिनी एफसी र धनगढी एफसीले प्रतिस्पर्धा गर्नेछन्।
आगामी वैशाख ११ देखि २५ गतेसम्म हुने प्रतियोगिताका खेल दशरथ रंगशालामा हुनेछन्। प्रतियोगिता सिंगल राउन्ड रोबिनको आधारमा संचालन हुनेछ।
एक टिममा बढीमा २० जना खेलाडी हुनेछन्। जसमा तीन जना विदेशी, एक मार्की र दुई स्थानीय खेलाडी हुनेछन्। बाँकी खेलाडी अक्सनबाट छनोट हुनेछन्। अक्सन आगामी शुक्रबार गर्ने आयोजनको भनाइ छ।
-1746009348.jpg)
