ब्राजिलका महान् फुटबल खेलाडी पेलेले पोर्चुगिज स्ट्राइकर क्रिस्टियानो रोनाल्डोलाई बधाइ दिएका छन्।
'इटालियन सिरि ए'अन्तर्गत आइतबार राति काग्लिआरीविरुद्धको खेलमा रोनाल्डोले ह्याट्रिक गरेका थिए। युभेन्ट्स ३-१ गोलले विजयी भएको खेलमा रोनाल्डोले खेलको १०, २५ र ३२ मिनेटमा गोल गर्दै ह्याट्रिक गरेका थिए।
रोनाल्डोले करिअरको गोल संख्या ७७० पुर्याएसँगै पेलेले बधाइ दिएका हुन्। पेलेले करिअरमा ७६७ अफिसियल गोल गरेको मानिदै आएको छ।
अफिसियल खेलमा रेकर्ड भंग गरेका रोनाल्डोको यात्रा सुन्दर भएको पेलले इन्स्टाग्राममा लेखेका छन्।
रोनाल्डोले स्वेदशी क्लब स्पोर्टिङ लिस्बनका लागि पाँच गोल गरेका थिए। त्यसपछि इंग्ल्यान्ड पुगेका उनले म्यानचेस्टर युनाइटेडका लागि ११८ गोल गरे। यस्तै स्पेनिस क्लब रियल म्याड्रिडका लागि ४५० गोल गरेका रोनाल्डोले युभेन्ट्सबाट ९५ गोल गरिसकेका छन्। पोर्चुगलका लागि रोनाल्डोले १०२ गोल गरेका छन्।
तर गोलको रेकर्डमा भने विवाद हुँदै आएको छ।
फुटबल सम्बन्धी तथ्य राख्ने सोकर फाउन्डेसनका अनुसार विश्वकै सर्वाधिक गोलकर्ता जोसेफ बिकन हुन्।
उनले ५३० खेलमा ८०५ करिअर गोल गरेको फाउन्डेसनको दाबी छ। फाउन्डेसनका अनुसार दोस्रो स्थानका ब्राजिलका रोमारियोले ७७२ गोल र पेलेले ७६७ गोल गरेका थिए।
यो तथ्यअनुसार रोनाल्डो विश्वको सर्वाधिक गोलकर्ताको सूचीमा तेस्रो स्थानमा छन्।
तर बिकनले गरेका कतिपय गोल आधिकारिक नभएको दाबी गरिदै आइएको छ।
सन् २००१ मा मृत्यु भएका बिकनले पाँच क्लब र दुई देशका लागि खेलेका थिए। उनले सन् १९३१ देखि १९५५ सम्मको करिअरमा र्यापिड भियना र स्लाभिया प्रागबाट फुटबल खेले। यस्तै अस्ट्रिया र चेकोस्लाभाकिया गरी दुई देशको राष्ट्रिय जर्सी लगाए।
बिकनले भियनाको रिजर्व टिमका लागि गरेको गोलको पनि गणना गरिएको केही रिपोर्टको दाबी छ। बिकनले आधिकारिक अन्तर्राष्ट्रिय खेलको मान्यता नपाएका खेलमा गरेका गोल पनि गणना गरिएको बताइएको छ।
एक रिपोर्टका अनुसार बिकनले ७५९ आधिकारिक गोल गरेका थिए। उनले क्लब फुटबलमा ७३० र अन्तर्राष्ट्रिय खेलमा २९ गोल गरेका थिए।
त्यो रिपोर्टलाई मान्ने हो भने रोनाल्डो विश्वकै सर्वाधिक गोलकर्ता हुन्।
उक्त रिपोर्टले पेलेले ७५७ र रोमारियोले ७४५ गोल गरेको उल्लेख गरेको छ।
तर पेले र रोमारियोले करिअरमा एक हजार भन्दा बढी गोल गरेको दाबी गरिँदै आएको छ।
केहिअघि मेसीले पेलेको रेकर्ड तोड्ने क्रममा एकै क्लबका लागि सर्वाधिक गोलको नयाँ रेकर्ड बनाएका थिए। पेलेले सान्तोसका लागि गरेको ६४३ गोलको रेकर्ड मेसीले तोडेका थिए।
तर पेलेले सान्तोसका लागि १०९१ गोल गरेको दाबी गरिदै आएको छ। मैत्रीपूर्ण खेलमा गरेको गोलसमेत गरेर उक्त तथ्य प्रस्तुत गरिएको हो।
पेलेको इन्स्टाग्रामको बायोमा 'लिडिङ गोल स्कोरर अफ अल टाइम (१२८३)' लेखेका छन्।
मैत्रीपूर्ण, आधिकारिकता नपाएका खेलमा गरेको गोल र आर्मी टिमका लागि गरेको गोल घटाउने हो भने उनले देश र क्लबका लागि गरेको गोल संख्या ७५७ हुन आउछ।
सन् २००७ मा रोमारियोले एक हजार गोलको खुसी मनाएका थिए। उनले गरेका ती गोल युवा टिम, मैत्रीपूर्ण र प्रदर्शनी खेलमा गरेका गोल समेत गरी हो।
ती गोल घटाउने हो भने रोमारियोको आधिकारिक गोल संख्या ७४५ हुन आउछ।
यो तथ्यलाई हेर्ने हो भने रोनाल्डो विश्वकै सर्वाधिक गोलकर्ता बनेका छन्। तर विवादरहित सर्वाधिक गोलकर्ता भने होइनन्।
-1746009348.jpg)
