फिफा विश्वकप कतार २०२२ र एएफसी एसियन कप चीन २०२३ को छनोट चरण अन्तर्गत समूह 'बी' का बाँकी खेल कुवेत हुने भएको छ। खेल आगामी मे ३१ देखि जुन १५ को बीचमा हुनेछ।
कोरोना भाइरसका कारण गत वर्षदेखि हुन नसकेको छनोटका खेलहरू अब एक समूहका खेल एक भेन्यूमा मात्र हुने भएको हो।
एसियाली फुटबल महासंघ (एएफसी) ले समूह 'बी' का बाँकी खेलको आयोजनाको जिम्मा कुवेतलाई दिने निर्णय गरेको हो।
यसअघि एएफसीले गत फागुन ७ मा छनोटको खेल तालिका परिमार्जन गर्दै नेपाल र अस्ट्रेलियाबीचको खेल दशरथ रंगशालामा आगामी मार्च ३० (चैत १७) गते गर्ने निर्णय गरेको थियो।
तर कोरोनाका कारण प्रभावित बनेपछि एएफसीले छनोटका खेलहरू होम एन्ड अवे नगरी एउटै भेन्यूमा गर्ने निर्णय गरेको हो।
यो निर्णयले नेपाललाई घाटा परेको छ। एएफसीले नयाँ निर्णय गरे अब नेपालले बाँकी रहेका आफ्ना तीन वटै खेल कुवेतमा खेल्नु पर्नेछ। यसअघि यी खेल नेपालले दशरथ रंगशालामा खेल्ने तय थियो।
छनोटमा नेपालले चाइनिज ताइपेई, अस्ट्रेलिया र जोर्डनसँग खेल्न बाँकी छ। यी तीन खेलहरु आगामी मे ३१ देखि जुन १५ को बीचमा हुनेछ।
छनोटमा समूह ‘बी’ मा नेपाल पाँच खेलमध्ये एउटामा जित निकाल्दै तीन अंक जोडेर चौथो स्थानमा छ।
नेपालले चाइनिज ताइपेईलाई हराएको थियो। अन्य चार खेलमा पराजित भएको थियो।
नेपालको समूहमा अस्ट्रेलिया १२ अंकका साथ शीर्ष स्थानमा छ। समान खेलबाट १० अंक जोडेका कुवेत र जोर्डन क्रमशः दोस्रो र तेस्रो स्थानमा छन्। कुनै अंक नजोडेको चाइनिज ताइपेई पाँचौं स्थानमा छ।
हेर्नुहोस् समूहका खेलहरू आयोजना गर्ने देशहरू :-
-1746009348.jpg)
