आर्सनलले युरोपा लिग अन्तर्गत अन्तिम ३२ को पहिलो लेगमा जित हात पारेको छ। बिहीबार राति भएको पहिलो लेगमा आर्सनलले स्वीडिस क्लब ओस्टरसून्ड्स एफकेलाई ३–० ले हराएको हो।
ओस्टरसून्ड्सको घरेलु मैदानमा भएको खेलमा आर्सनललाई जित दिलाउन नाचो मोनरियल र मोसिट ओजिलले एकएक गोल गरेका थिए। आर्सनलले एक गोल आत्मघाती उपहार पाएको थियो। ओस्टरसून्ड्सका सोटीरिओस पापाजीयानोपोलोसले आत्मघाती गोल गरेका थिए।
पहिलो हाफको १३ औं मिनेटमा नाचोको गोलबाट आर्सनलले सुरुवाती अग्रता बनाएको थियो। खेलको २४ औं मिनेटमा ओस्टरसून्ड्सका सोटीरिओसले आत्मघाती गोल गरेपछि आर्सनलले २ – ० को अग्रता बनायो । दोस्रो हाफको ५८ औं मिनेटमा ओजिलले गोल गर्दै आर्सनललाई ३ – ० को अग्रता दिलाए।
पहिलो लेगको जितसँगै आर्सनलले युरोपा लिगको अन्तिम १६ मा पुग्ने सम्भावना बलियो बनाएको छ। दुई टोलीबीचको दोस्रो लेग अर्को हप्ताको बिहिबार आर्सनलको मैदान इमिरेट्स स्टेडियममा हुनेछ।
