आइसिसी विश्वकप लिग-२ अन्तर्गत अमेरिकामा हुने अमेरिका, स्कटल्यान्ड र नेपालबीचको त्रिकोणात्मक एकदिवसीय सिरिजका लागि नेपाली टोलीको मेन्टरमा पुबुदु दासानायके नियुक्त भएका छन्।
कात्तिक ९ देखि हुने सिरिजका लागि नेपालका पूर्व प्रशिक्षक पुबुदुलाई मेन्टर नियुक्त गरेको नेपाल क्रिकेट संघले जनाएको छ।
त्यसअघि नेपाल र अमेरिकाबीच टी-२० सिरिज हुँदैछ।
नेपाल र अमेरिकाबीचको तीन खेलको टी-२० सिरिज भोलिदेखि सुरु हुँदैछ। नेपाली समयअनुसार शुक्रबार विहान ५:४५ बजे तथा अमेरिकाको टेक्सासको समयअनुसार साँझ ७ बजे खेल हुनेछ।
नेपाल र अमेरिकाबीचको सिरिज टेक्सासको डलासस्थित ग्रान्ड प्रिएरी रंगशालामा हुनेछ।
नेपाल र अमेरिकाबीच यो पहिलो टी-२० अन्तर्राष्ट्रिय खेल हुनेछ। आइसिसीले सन् २०१९ मा सबै देशको खेललाई अन्तर्राष्ट्रिय मान्यता दिएपछि नेपाल र अमेरिका टी-२० मा पहिलो पटक भिड्न लगेका हुन्।
यसअघि आइसिसी टी-२० विश्वकपअन्तर्गत वाम अप खेलमा नेपाल र अमेरिका खेल्ने तालिका भए पनि डलासमा भारी वर्षा हुँदा रद्द भएको थियो।
नेपाली टोली क्यानडामा आइसिसी विश्वकप लिग-२ को सिरिज र टी-२० सिरिज खेलेपछि अमेरिका पुगेको थियो। क्यानडा र ओमानविरूद्धको दुवै सिरिजमा नेपालले खराब प्रदर्शन गरेको थियो।
अमेरिकासँगको खेलमा नेपाली टोलीका स्पिनर सन्दीप लामिछाने हुनेछैनन्। उनी भिसाका कारण अमेरिका जान नपाएका हुन्।
नेपालले अमेरिकासँग तीन वटा टी-२० सिरिज खेलेपछि विश्वकप लिग-२ को सिरिज खेल्नेछ। लिग-२ को सिरिजमा नेपाल, अमेरिका र स्कटल्यान्डबीच प्रतिस्पर्धा हुनेछं।
