जुम्लाको सिंजा गाउँपालिका- ४ का ४८ वर्षीय शिवचन्द्र बुढाले चलाएको मोटरसाइकलले सोमबार दिउँसो दाङको लमही नगरपालिका-९ अमेलीयाकी ४५ वर्षीया आशा कुमाललाई ठक्कर दियो।
मंगलबार पूर्व-पश्चिम राजमार्ग अन्तर्गत पश्चिमबाट पूर्वतर्फ जाँदै गर्दा बुढाले चलाएको मोटरसाइकलले पैदलयात्री कुमाललाई अमेलियामा ठक्कर दिएको थियो। त्यसपछि पैदलयात्री आशा छटपटाइ रहेकी थिइन्। ठक्कर दिएपछि सुर्खेतको विरेन्द्रनगर नगरपालिका- १२ बस्दै आएका बुढाको साथमा एउटा झोला थियो। प्रहरी दुर्घटनास्थलमा पुग्नुअघि नै बुढाले उक्त झोला स्थानीय रीता चौधरीलाई समेत जानकारी नदिइ उनको घरमा आफ्नो झोला राखिदिन्छन्।
दुर्घटनास्थलमा मानिसहरू जम्मा भएको हुँदा बुढा भाग्न सक्ने अवस्थामा नभएको दाङका प्रहरी प्रवक्ता डिएसपी चक्रबहादुर शाहले बताए। त्यसबेला बुढासँग झोला नभएको उनले बताए।
ठक्करबाट घाइते आशाको बाँकेमा उपचार भइरहेको छ।
प्रहरीले बुढालाई मोटरसाइकलसहित नियन्त्रणमा लिएको थियो।
अर्कातर्फ सोहीबेला रीताले आफ्नो घर भित्र नयाँ झोला देखेपछि आश्चर्य मान्छिन् र खोलेर हेर्छिन्। झोलामा रिताले पहिचान गर्न नसक्ने वस्तुहरू फेला परेपछि प्रहरीलाई फोन गर्छिन्।
'झोला खोलेर हेर्दा त्यसमा बहुमूल्य जडीबुटी, ४९५ ग्राम यार्सागुम्बा, कस्तुरीको बिना जस्तो देखिने र अत्तरको जस्तो सुगन्ध आउने कालो रङका दानाहरू तीनबट्टा र साना धुलोका कनहरू फेला परेको थियो', उनले भने।
दुर्घटनापछि उक्त सामानसहित पक्राउ पर्ने डरले बुढाले सुटुक्क रीताको घरमा झोला लुकाएको अनुसन्धानबाट खुलेको उनले बताए।
पक्राउ परेका बुढालाई आवश्यक कारबाहीका लागि डिभिजन वन कार्यालय लमही दाङमा बुझाइएको प्रहरीले जनाएको छ।
