राष्ट्रिय पुनर्निर्माण प्राधिकरणले बाढीबाट प्रभावित तराईका जिल्लामा पुनर्निर्माण गर्ने जिम्मेवारी पाएको छ।
बाढी प्रभावित क्षेत्रको पुनर्निर्माणका लागि आवश्यक अध्ययन गरी नीतिगत व्यवस्था मिलाउन र पुनर्निर्माणको समन्वय गर्न प्राधिकरण मातहत विशेष बाढी पुनर्निर्माण आयोजना एकाइ निर्माण गरिएको हो।
मन्त्रिपरिषद्को कात्तिक ६ गतेको बैठकले बाढी तथा डुबान प्रभावित क्षेत्रमा पुनर्स्थापना तथा पुनर्निर्माण गराउने विषयको अध्ययन, नीतिगत सम्बोधन र पुनर्निर्माणको समन्वय गर्न प्राधिकरणअन्तर्गत विशेष एकाइको गठन गर्ने निर्णय गरेको थियो।
यो विशेष एकाइको आयोजना प्रमुखका रुपमा सुमन कर्ण नियुक्त भएका छन्। कर्णले कात्तिक १३ गते सोमबारदेखि नै जिम्मेवारी सम्हालेका छन्। मोरङका कर्णले यसअघि प्राधिकरणमा प्रमुख कार्यकारी अधिकृतको विशेष सल्लाहकारका रुपमा काम गरेका थिए।
शहरी विकासमा विद्यावारिधि गरेका कर्णसँग संयुक्त राष्ट्रसंघमा आबद्ध भई इराक, सुडान, अफगानिस्तान र जोर्डनमा पुनर्निर्माण तथा विकाससम्बन्धी कार्य गरेको अनुभव छ।
बाढीबाट तराईमा भएको क्षतिको विस्तृत अध्ययन राष्ट्रिय योजना आयोगले गरिरहेको आयोजना प्रमुख कर्णले बताए। अहिलेसम्म अनुमानित ६० हजार घर पूर्णरुपमा क्षति भएको विवरण प्राप्त भएको प्राधिकरणले जनाएको छ।
‘आंशिकरुपमा क्षति भएका घरको विवरण आयोगको प्रतिवेदनपछि मात्र भन्न सकिन्छ, बाढीको क्षति कम भएकाले छिटोछरितो पुनर्निर्माण गरिन्छ, पुनर्निर्माणमा स्थानीय तहलाई पनि सहभागी गराएर पीडितलाई राहत दिने योजना बनाएका छौँ।’उनले भने।
बाढीले तराईमा सिँचाइ, कृषि, सडक, पुललगायत भौतिक संरचनामा पनि क्षति पुर्याएको थियो। बाढीबाट तराईका २४ जिल्ला प्रभावित बनेका थिए। आयोगले गरेको अध्ययनको प्रतिवेदन यसै साता प्राधिकरणलाई बुझाउने जनाइएको छ।
