नेपाली कांग्रेसका सभापति शेरबहादुर देउवाले संविधानमा भएको निर्वाचनसम्बन्धी व्यवस्थाका कारण कुनै पनि पार्टीलाई एकल बहुमत ल्याउन गाह्रो हुने धारणा राखेका छन्।
नेपाली कांग्रेस चितवनले शुक्रबार आयोजना गरेको प्रजातन्त्र सेनानी स्वर्गीय गौरीदेवी प्रधानको सातौं दिनको पुण्यतिथिमा आयोजित श्रद्धाञ्जली सभामा बोल्दै सभापति देउवाले यस्तो धारणा राखेका हुन्।
संविधानमा भएको समावेशी र समानुपातिक प्रणालीकै कारण कुनै पनि पार्टीले एकल बहुमत ल्याउन नसक्ने उनको भनाइ छ।
उनले निर्वाचनमा टिकट नपाए आफ्नै नेतालाई हराइदिने पार्टीभित्रको रोगको अन्त्य गर्न जरूरी रहेको समेत बताए।
कांग्रेसकै कारण प्रधानमन्त्री र सभापति हुन पाएको उल्लेख गर्दै उनले पार्टीलाई बलियो बनाउनुबाहेक आफूमा कुनै अरू सोच नरहेको समेत बताए।
उनले भने, ‘अहिलेको संविधान राम्रो, समावेशी र समानुपातिक छ। सबै जातिहरूको प्रतिनिधत्व भएको छ संविधानमा। तर कुनै पनि पार्टीको बहुमत आउन गाह्रो छ। एक्लै कुनै पनि पार्टीले बहुमत ल्याउन निकै गाह्रो छ। फेरि हाम्रो पार्टीमा रोग पनि रहेको छ। टिकट त एक जनाले मात्रै पाउँछ नि। नपाउनेले निर्वाचनमा हराइहाल्छ। त्यसकारण पार्टीभित्रको यो रोग पनि हटाउन आवश्यक रहेको छ। मेरो त उमेर भइसकेको छ। तर यही पार्टीको कारणले सभापति र प्रधानमन्त्री भएँ। त्यसैले पनि यो पार्टीलाई बलियो र राम्रो बनाउने मेरो उद्देश्य छ। मैले अघि नै भनिसके हाम्रो संविधान समावेशी र समानुपातिक छ तर कुनै न कुनै पार्टीसँग मिल्नैपर्ने आवश्यकता छ।’
संविधानको रक्षा गर्दै एकल बहुमत ल्याउन सक्ने गरी सबै मिलेर संगठन निर्माणमा लाग्नुपर्ने उनको भनाइ छ। —न्युज एजेन्सी नेपाल
