नेपाली कांग्रेसका महामन्त्री गगनकुमार थापाले नेपाली समाजमा अहिले असन्तुष्टिको आगोमा मट्टितेल छर्किने काम भइरहेको बताएका छन्।
सोमबार पार्टी केन्द्रीय कार्यालय सानेपामा आयोजित एक कार्यक्रमलाई सम्बोधन गर्दै उनले यस्तो बताएका हुन्।
उनले अहिले नेपाली समाजभित्र पूरा असन्तुष्टिका स्वरहरू रहेको बताए।
उनले जनतामा रहेको असन्तुष्टि, आक्रोश र रिसलाई केहीले पेट्रोल, मट्टितेल छर्किएर दन्दनी बाल्ने काम गरिरहेको टिप्पणी गरे।
उनले उनीहरूलाई सबैले चिन्नुपर्ने र किन गरिरहेका छन् भन्ने बुझ्न जरूरी रहेको जिकिर गरे। तर आगो सल्काउन मद्दत गर्नेहरूमाथि मात्रै प्रश्न गरेर नहुने भन्दै जनताका आक्रोशहरू समाधान गर्नुपर्ने उनले बताए। कांग्रेसले त्यसको तागत राख्ने पनि उनको भनाइ छ।
उनले भने, ‘यो बेलामा नेपाली समाजभित्र पूरा असन्तुष्टि छ। आगो बलेको जस्तो भएको छ। जता गए पनि हामी कहीँ न कहीँ रिस, आक्रोश, असन्तुष्टि देख्छौँ। त्यो असन्तुष्टिको आगोमा मट्टितेल खन्याएको खन्यै छन्। मट्टितेल ल्याएका छन्, पेट्रोल हालेका छन्, जेजे हालेका छन्। दन्दनी बालिरहेका छन्। कसले गरिरहेको छ, किन गरिरहेको छ? हामी तिनलाई चिन्छौँ, थाहा छ। कसले, किन गरिरहेको छ, त्यसको भाषा के छ, तिनलाई चिन्नुपर्छ। प्रश्न गर्नुपर्छ। असन्तुष्टिको आगोमा कसले मट्टितेल खन्याएको छ, त्यसतर्फ मात्रै औंला ठड्याएर हुँदैन। असन्तुष्टिको आगो किन बलिरहेको छ, त्यसलाई बुझाउनुपर्छ। हाम्रो जिम्मेवारी हो। त्यो तागत हामी राख्छौँ।’
महामन्त्री थाापले काम र परिणामबाट असन्तुष्टिको आगो निभाउनुपर्ने बताए।
उनले नेपाली कांग्रेसभित्र शुद्धीकरण, जागरण चाहिएको पनि बताए। —न्युज एजेन्सी नेपाल
-1746009348.jpg)
