जनता समाजवादी पार्टी (जसपा) नेपालले लुम्बिनी प्रदेश सरकारलाई दिएको समर्थन शुक्रबार फिर्ता लिएको छ।
पार्टीका तर्फबाट लुम्बिनी प्रदेश सभा सदस्य अम्बिका काफ्लेले शुक्रबार समर्थन फिर्ता लिएको बेहोरा सहितको पत्र बुझाएको मुख्यमन्त्री चेतनारायण आचार्यको सचिवालयले जानकारी दिएको छ। काफ्लेले मुख्यमन्त्री आचार्यलाई भेटेर समर्थन फिर्ताको पत्र बुझाएकी हुन्।
काफ्लेले बुझाएको पत्रमा सरकारलाई दिएको समर्थन फिर्ता लिएको उल्लेख छ।
साथै उनले पत्र मार्फत प्रदेश सभा बैठकमा विपक्षीको आसनमा व्यवस्था मिलाउन पनि आग्रह गरेका छन्।
जसपा नेपालले समर्थन फिर्ता लिने पत्र बुझाएपनि छलफल भइरहेको मुख्यमन्त्रीको सचिवालयले जानकारी दिएको छ। लुम्बिनी प्रदेशमा जसपा नेपालबाट काफ्ले एक मात्र सांसद हुन्।
काफ्लेले सेतोपाटीसँग कुरा गर्दै सरकार तलमाथि नपर्ने भएपनि असफल भएकाले समर्थन फिर्ता लिएको बताइन्।
‘सरकारले राम्रो काम गर्ला भनेर पार्टीले समर्थन गरेको थियो। जनता र हामी सांसदले समेत अपेक्षा गरे अनुसार अहिलेको सरकारले काम गर्न नसकेपछि पार्टीले समर्थन फिर्ता लिएको हो। हाम्रो पार्टीले समर्थन गर्दा र फिर्ता लिँदा सरकार तलमाथि नहुने भएपनि असफल बनेकाले समर्थन फिर्ता लिँदा नै उपयुक्त लाग्यो,’ उनले भनिन्।
उपेन्द्र यादव नेतृत्वको जसपा नेपालले केन्द्रमा पनि सरकारलाई दिएको समर्थन फिर्ता लिने केन्द्रीय कार्यकारिणी समिति बैठकले निर्णय लिएको थियो। समितिले गरेको निर्णय संसदीय दलको बैठकले सदर गरेपछि समर्थन फिर्ता लिने तयारी छ।
-1715151161.jpg)
