मोरङको धनपालथान–४ स्थित उमागौरी सहकारीको रकम हिनामिना प्रकरणको मुद्दा उच्च अदालत विराटनगरमा विचाराधीन छ।
यही क्रममा बिहीबारका लागि न्यायाधीश विष्णुप्रसाद अर्यालको इजलासमा मुद्दाको पेसी तोकिएको थियो। तर, पेसी स्थगित भएको छ। आजसहित यो मामिलाको पेसी स्थगित भएको यो चौथो पटक हो।
मुद्दाका प्रतिवादीका एक कानुन व्यवसायीले निवेदन दिएपछि पेसी स्थगित भएको उच्च अदालत विराटनगरले जनाएको छ।
यो सहकारीको रकम हिनामिना प्रकरणमा प्रतिनिधिसभा सार्वजनिक लेखा समिति सभापति ऋषिकेश पोखरेलकी पत्नी अन्जला कोइराला पनि जोडिएकी छन्।
उमागौरीको रकम हिनामिना प्रकरणमा मुछिएकी अन्जलासहित ६ जनालाई धरौटीमा छाड्ने जिल्ला अदालत मोरङको आदेशविरूद्ध सरकारी वकिल कार्यालय उच्च अदालत गएको थियो।
अञ्जलासहित धरौटीमा छाडिएका सबैलाई थुनामा राखेर मुद्दा चलाउनुपर्ने मागसहित उच्च गएको मोरङ सरकारी वकिल कार्यालयको निवदेनमा गएको वैशाख ११ मा सुनुवाइ भएको थियो।
त्यसबेला दुई जना न्यायाधीशको राय बाझिएर मुद्दा अनिर्णित बनेपछि तेस्रो न्यायाधीशको इजलासमा पुगेको थियो। त्यसयता यो मुद्दाको पेसी स्थगित भएको भयै छ।
उमागौरी सहकारीको २२ करोड ४८ लाख २७ हजार ७ सय रुपैयाँ हिनामिना भएको भन्दै मुद्दा दर्ता भएको थियो।
अहिले सहकारीका अध्यक्ष शम्भुप्रसाद रौनियार र धनपालथान–४ का पूर्ववडाध्यक्ष रोशन राजवंशी पुर्पक्षका लागि कारागारमा छन्। ६ जना धरौटीमा रिहा भएका छन्। यो मुद्दामा अदालतले पक्रन अनुमति दिएका १७ जना अझै फरार छन्।
