राष्ट्रिय प्रजातन्त्र पार्टी (राप्रपा) को भ्रातृ संगठन राष्ट्रिय प्रजातान्त्रिक युवा संगठनका संयोजक सुजित केसीलाई प्रहरीले सर्वोच्च अदालतमा उपस्थित गराएको छ।
नेपाल प्रहरीको साइबर ब्युरोले सोमबार उनलाई सर्वोच्चमा उपस्थित गराएको हो।
बन्दी प्रत्यक्षीकरणको रिट दायर गरेका उनलाई सर्वोच्च अदालतका न्यायाधीश तीलप्रसाद श्रेष्ठको आइतबारको इजलासले अदालतमा उपस्थित गराउन र विपक्षीका नाममा कारण देखाउन आदेश दिएको थियो।
उक्त आदेशसँगै सोमबार उनलाई सर्वोच्चमा उपस्थित गराएको हो। यसको लागि मंगलबारको पेसी राखिएको राखिएको छ।
साइबर ब्युरोले केसीलाई शुक्रबार पक्राउ गरेको थियो। गैरकानुनी रूपमा थुनामा राखेको भन्दै केसीको तर्फबाट अधिवक्ता राजकुमार श्रेष्ठले रिट दायर गरेका थिए।
उनीमाथि साइबर ब्युरोले विद्युतीय कारोबार ऐन २०६३ को दफा ४७ अनुसार अनुसन्धान गर्नुपर्ने भन्दै पक्राउ गरेको थियो। उनले सामाजिक सञ्जालमार्फत अफवाह फैलाएको ब्युरोको आरोप छ।
उनलाई पक्राउ गरेपछि राप्रपाले विरोध जनाउँदै आएको छ।
