सर्वोच्च अदालतले गभर्नर सिफारिस समितिबाट राजीनामा दिएका योजना आयोगका पूर्वउपाध्यक्ष विश्व पौडेलविरूद्ध परेको रिट दरपीठ गरेको छ।
गभर्नर बन्न अयोग्य रहेको भन्दै सर्वोच्चमा मंगलबार पेस भएको रिट तीन दिनपछि शुक्रबार सर्वोच्चले दरपीठ गरेको हो।
अधिवक्ताहरू प्रतिभा उप्रेती र विशाल थापाले पौडेललाई गभर्नर बनाउन नहुने भन्दै पेस गरेको रिटलाई सर्वोच्च अदालतका रजिष्ट्रार भद्रकाली पोखरेलले दरपीठ गरेको सूचना अधिकारी निराजन पाण्डेले जानकारी दिए।
‘गभर्नर सिफारिस समितिले उहाँलाई सिफारिस गरिसकेको पनि देखिँदैन। समाचारमा आएको भरमा मात्रै अपरिपक्व अवस्था भएकाले त्यसलाई आधार मान्न भएन भन्ने खालको कुरा छ,’ उनले भने, ‘अर्को सामूहिक अधिकारको हनन् भयो भन्ने कुरा उल्लेख रहेछ। तर कसरी हनन् भयो भन्ने खुलाउन नसकेको भनिएको छ।’
राजनीतिक दलमा सदस्य भएका व्यक्ति गभर्नर नियुक्त हुन नसक्ने र नेपाली कांग्रेसको महासमिति सदस्य तथा निर्वाचनमा पराजित प्रतिनिधि सभा सदस्यको उम्मेदवार रहेकाले पौडेललाई गभर्नर बनाउन नहुने रिटमा उल्लेख थियो।
