नेकपा (एमाले) ले प्रदेशको नीति तथा कार्यक्रम र बजेटको तयारीका सन्दर्भमा प्रदेश सरकारका आफ्ना मुख्यमन्त्री, मन्त्री र प्रदेश सभा सदस्यसँग भर्चुअल बैठक गरेको छ।
महासचिव शंकर पोखरेल र संघीय सरकारका उपप्रधान एवम् अर्थमन्त्री विष्णु पौडेलले सोमबार भर्चुअल बैठक गरेका हुन्।
बैठकमा पार्टी उपाध्यक्षसमेत रहेका अर्थमन्त्री पौडेलले संघीय सरकारको तर्फबाट अवलम्बन गरिएका सोचबारे बताएका थिए। त्यस्तै उनले प्रदेशले बजेट तयार गर्दा ध्यान दिनुपर्ने विषयबारे पनि बताएको महासचिव पोखरेलले जानकारी दिए।
छलफलमा सातै प्रदेशका एमाले प्रदेश सभा दलका नेता/मुख्यमन्त्रीहरूले पनि सम्बन्धित प्रदेशको अवस्था, प्राथमिकताबारे बताएका थिए।
बैठकको सहजीकरण एमाले केन्द्रले गरेको महासचिव पोखरेलले बताए।
संघीय सरकारले जेठ १५ गते बजेट ल्याउने गर्छ। अहिले संसदमा प्रि–बजेट छलफल सुरू भएको छ। प्रदेश सरकारले भने असार ३ गते बजेट ल्याउने गरेका छन्।
एमालेको अहिले कोशी, लुम्बिनी र कर्णाली प्रदेशमा आफ्नो सरकार छ। मधेसमा जनमत, बागमती, गणडकी र सुदूरपश्चिमा नेपाली कांग्रेससँग सत्ता साझेदारी गरिरहेको छ।
