स्वतन्त्र सांसद अमरेशकुमार सिंहले अहिलेको बजेट माओवादीको ३२ सांसदका लागि मात्रै ल्याइएको दाबी गरेका छन्।
आइतबार प्रतिनिधि सभामा बजेटमाथिको छलफलमा सहभागी हुँदै सांसद सिंहले बजेट अर्थमन्त्रीको निर्देशनमा व्यापारीले बनाएको र माओवादी केन्द्रका सांसद जितेका क्षेत्रहरूमा मात्रै पठाएको बताए।
माओवादी समाप्त हुने संघारमा रहेकाले पनि भएभरको बजेट आफ्ना सांसदहरू रहेको क्षेत्रमा खन्याएको सिंहले आरोप लगाए।
'माओवादी पार्टी समाप्त हुने अन्तिम संघारमा छ। त्यसैले आ-आफ्नो सांसद कहाँ कहाँ जित्न सकिन्छ त्यहाँमात्र बजेट खन्याइएको छ।हामीजस्ता निर्दलीय सांसदलाई उहाँहरूले देख्नु हुन्न। अर्कातिर अर्थमन्त्रीको चाकडी गरिन,' उनले भने।
उनले सरकार र विशेषगरी संघीय मामिला मन्त्रालयले भ्रष्टाचार बढावा दिएको बताए।
'जब कर्मचारीको सरूवा २ वर्ष नभई गर्न नपाइने भनेर लेखिएकै छ भने के कारणले हुन्छ तीन-तीन, ६/६ महिनामा सरूवा?,' उनले भने।
सिंहले एकातिर ऊर्जामा आत्मनिर्भर भएको भन्ने र अर्कातिर १२ घन्टासम्म लोडसेडिङ हुने गरेको बताए।
'भर्खरै आफ्नो निर्वाचन क्षेत्रमा पुगेर आए। १२ घन्टा लोडसेडिङ छ। ४२/४३ डिग्री सेल्सियसको तापक्रममा त्यहाँका मान्छेहरू कसरी बँचिरहेको होला? त्यो कहिले चिन्ता हुँदैन। काठमाडौंमा पनि झ्यापझ्याप जान, विकास करिडोरहरूमा पनि त्यस्तै हुन्छ,' उनले भने।
उनले प्रधानमन्त्री र अर्थमन्त्रीबाट नै बजेटबाट समान धारणा नआएको बताए।
'प्रधानमन्त्रीले ३ करोडभन्दा कमको बजेट संघले हेर्दैन भन्नुहुन्छ। मन्त्री १ लखबाट घटाउँदिन भन्छन्। प्रधानमन्त्री ठूलो कि मन्त्री ठूलो,' उनले भने।
हरेक वर्ष मुद्रास्फिती हुने तर कर्मचारीको तलब नबढ्नाले पनि भ्रष्टाचार बढेको उनको भनाइ थियो।
