नेपाली कांग्रेसका प्रमुख सचेतक रमेश लेखकले प्रधानमन्त्री पुष्पकमल दाहाल 'प्रचण्ड' राम्रो प्रधानमन्त्रीको ठाउँमा राम्रो जादुगर बनेर आएको टिप्पणी गरेका छन्।
काठमाडौंमा सोमबार भएको एक कार्यक्रममा बोल्दै लेखकले अस्थिरताको चुनौती कायम रहेको पनि बताए।
‘कतिपय चुनौतिहरु अहिले पनि हामीले व्यहोर्नु परिरहेको छ। अहिले अस्थिरताको चुनौति छ। मुलुकमा स्थिरता, समृद्धि, मुलुकको उन्नति, दिगो शान्ति, विकास र सुशासन आजको आवश्यकता छ। तर राजनीतिक अस्थिरताले यि सबै कुरालाई ओझेलमा राखेको छ,’ उनले भने।
उनले देशलाई राम्रो प्रधानमन्त्री चाहिएको पनि बताए।
‘प्रधानमन्त्रीजीले यो मेरो संख्या होइन जादु हो भन्नुभएको छ। हामीलाई राम्रो प्रधानमन्त्री चाहिएको छ, उहाँ राम्रो जादुगर भएर आउनुभइएको छ। त्यस्तो विडम्बनामा हामीले बाँच्नु परिरहेको छ,’ उनले भने।
(न्युज एजेन्सी नेपाल)
