कर्णाली प्रदेश सरकारले लुम्बिनी प्रदेशसँग जोडिएका बबई र कपुरकोटमा तथ्यांक संकलक खटाएको छ।
प्रदेश सरकार भूमि व्यवस्था, कृषि तथा सहकारी मन्त्रालयले यही मङ्सिर ७ गतेबाट कर्णालीमा आयात र निर्यात हुने कृषि उपजको तथ्यांक अभिलेखीकरण गर्न तथ्यांक संकलक खटाएको हो।
मन्त्रालयका सचिव डा नरहरि घिमिरेले प्रदेशभित्रका कृषि र पशुपक्षीजन्य वस्तुको उत्पादन र बजारीकरण प्रवर्द्धन गर्ने उद्देश्यका साथ यस प्रदेशमा आयात निर्यात हुने कृषि उपजको तथ्यांक सङ्कलन गर्ने कार्य सुरू गरिएको बताए।
‘हामीले जिल्लाका सुरक्षा निकाय र सरोकारवालासँगको समन्वय र सहकार्यमा तथ्यांक सङ्कलनको काम थालेका छौँ,’ उनले भने, ‘यसका लागि यही मङ्सिर ७ गते नै दुवै नाकामा दुई–दुई जना तथ्यांक संकलक खटाइसकेका छौँ।’
यसबाट कर्णाली प्रदेशमा उत्पादित भएर जाने र बाह्य क्षेत्रबाट आउने कृषि उपजको यथार्थ तथ्यांक प्राप्त हुने आशा गरिएको उनले बताए।
मन्त्रालयका प्रवक्ता धनबहादुर कठायतले यथार्थ तथ्यांक उपलब्ध नहुँदा बजार व्यवस्थापन र गुणस्तर नियन्त्रणमा परेको कठिनाइ अब हुने तथ्यांक सङ्कलनबाट सकिएर जाने बताए।
उनले भने, ‘उक्त नाकाबाट दैनिक उपलब्ध हुने कृषि उपजका आयात तथा निर्यातको तथ्यांकलाई मन्त्रालय र मातहतका निकायले विश्लेषण गर्नेछन्। यसले बजार व्यवस्थापन र गुणस्तर प्रवर्द्धन गर्नेछ।’
उपलब्ध तथ्यांकमार्फत यस मन्त्रालयलाई भावी नीति, कार्यक्रम तथा योजना बनाउन महत्तवपूर्ण सहयोग पुग्ने आशा गरिएको प्रवक्ता कठायतले बताए।
उनका अनुसार मन्त्रालयबाट खटाइएका तथ्यांक संकलकले पालो मिलाई चौबीसै घण्टा दुवै नाकाबाट प्रदेशभित्र आवातजावत गर्ने सवारीसाधनलाई सुरक्षा निकायसँगको समन्वयमा कृषि उपजको विवरणको सोधखोज गरी लिनेछन्।
