सुदूरपश्चिमलाई पर्यटकीय दृष्टिकोणले ‘भर्जिन ल्याण्ड’ भएको उल्लेख गर्दै सरकारले पर्यटन पूर्वाधारमा लगानी गर्न निजी क्षेत्रलाई आह्वान गरेको छ।
संस्कृति, पर्यटन तथा नागरिक उड्डयन मन्त्रालय, सुदूरपश्चिम सरकार र नेपाल पर्यटन बोर्डको सहकार्यमा शुक्रबार आयोजित पर्यटनसम्बन्धी छलफल तथा अन्तर्क्रिया कार्यक्रममा पर्यटनमन्त्री बद्री प्रसाद पाण्डेले लगानीकर्तालाई सुदूरपश्चिमको ठूलो सम्भावनामा ध्यान दिन आग्रह गरे।
मन्त्री पाण्डेले सुदूरपश्चिमलाई 'नेचर, कल्चर र एडभेन्चर'को समिश्रण भएको प्रदेश बताउँदै निजी क्षेत्रलाई विश्वासमा लिएर लगानीमैत्री वातावरण बनाउन कानुनी उल्झन समाधान गर्ने र नीतिगत सुधारमा ध्यान दिने बताए।
त्यसैगरी मुख्यमन्त्री कमल बहादुर शाहले सुदूरपश्चिम सरकार निजी क्षेत्रलाई स्वागत गर्न आतुर रहेको बताउँदै राष्ट्रिय तथा अन्तर्राष्ट्रिय स्तरमा सुदूरपश्चिमका सम्भावना देखाउन चाहेको बताए। साथै आवश्यक कानुनी सुरक्षाको ग्यारेन्टी लिन तयार रहेको उनी बताउँछन्।
आगामी मंसिर १ र २ गते धनगढीमा लगानी सम्मेलन आयोजना हुँदैछ। सम्मेलनअघि सुदूरपश्चिम सरकारले काठमाडौँमा आएर विभिन्न निकायसँग छलफल गर्दै सम्भावना प्रस्तुत गरिरहेको छ।
अन्तर्क्रिया कार्यक्रममा होटल व्यवसायी संघका अध्यक्ष विनायक शाह, पर्यटन बोर्डका प्रमुख कार्यकारी अधिकृत दीपकराज जोशी, नाटाका सीईओ युविका राज भण्डारीलगायत सहभागी थिए।
हालै सरकारले सुदूरपश्चिम र कर्णाली प्रदेशका हिमाल आरोहण दुई वर्षका लागि निःशुल्क घोषणा गरेको छ। त्यस्तै, धनगढी विमानस्थलको स्तरोन्नति र कञ्चनपुर विमानस्थल निर्माण अन्तिम चरणमा पुगेको उल्लेख गर्दै धार्मिक, सांस्कृतिक र प्राकृतिक दृष्टिले सम्पन्न सुदूरपश्चिममा पर्यटन पूर्वाधार विकासका लागि लगानी गर्न आह्वान गरिएको हो।
-1755241369.jpg)
-1746009348.jpg)
